Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 770 Hüküm no: 621 Orijinal metin no: [143b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vasiyetini yerine getirmek üzere Mehmed Efendi’yi vasi tayin ettiği Husûs-ı âti’z-zikrin mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Kabasakal Sinan Ağa mahallesinde sâkin iken bundan akdem vefât eden Mustafa Ağa b. Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun verâseti zevce-i menkûhası Afife Hatun bt. Abdullah ile li-ebeveyn kız karındaşı İsmihan Hatun bt. Ahmed’e münhasıra olduğu tahakkukundan sonra mahalle-i mezbûrede sâkine olup vech-i âtî üzere müteveffâ-yı mezbûrun vasiyy-i muhtârı olduğunu iddi‘â eden bâ‘isü’l-kitâb eş-Şeyh Mehmed Efendi b. Şa‘bân meclis-i ma‘kūd-ı mezbûrda zâtları mahalle-i mezbûre ahâlîsinden el-Hâc Hasan b. Ali ve Müezzin el-Hâc Abdullah b. Hasan ta‘rîfleriyle mu‘arrefe ve tereke-i müteveffâ-yı mezbûra vâzı‘atü’l-yed olan mezbûretân Afife ve İsmihan mahzarlarında üzerlerine da‘vâ edip müteveffâ-yı mezbûr Mustafa Ağa b. Ahmed b. Mehmed hâl-i marazında bi-emrillâhi te‘âlâ dâr-ı fenâdan dâr-ı bekāya irtihâl eylediğimde ber-vech-i mesnûn levâzım-ı techîz ve tekfînim görülüp ba‘dehû sülüs-i malımdan ıskāt-ı salâtım içün yirmi beş guruş ve hukūk-ı ibâd içün otuz guruş ve hemşîresi mezbûre İsmihan’ın zevci Derviş Bey b. Mustafa’ya yüz guruş deynim içün yüz guruş verile deyü vasiyet ve tenfîzine beni vasiyy-i muhtâr nasb ü ta‘yîn edip ben dahi muvâcehesinde ba‘de’l-kabûl musırran alâ-îsâihî fevt olup tenfîz-i vesâyet murâd eylediğimde mezbûreler mâni‘a olurlar suâl olunsun dedikde gıbbe’s-suâl mezbûretân Afife ve İsmihan cevâblarında tereke-i müteveffâ-yı mezbûra vaz‘-ı yedlerini ikrâr müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden olup mahalle-i mezbûre ahâlîsinden Mustafa Çelebi b. Hasan ve el-Hâc Hasan b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Mustafa Ağa b. Ahmed b. Mehmed hâl-i marazında bi-emrillâhi te‘âlâ Dâr-ı bekāya irtihâl eylediğimde ber-vech-i mesnûn levâzım-ı techîz ve tekfînim görülüp ba‘dehû sülüs-i malımdan ıskāt-ı salâtım içün yirmi beş guruş ve hukūk-ı ibâd içün otuz guruş ve hemşîresi mezbûre İsmihan’ın zevci Derviş b. Mustafa’ya yüz guruş müdde‘î-i merkūm eş-Şeyh Mehmed Efendi’ye yüz guruş verile deyü huzûrumuzda vasiyet ve tenfîzine merkūm eş-Şeyh Mehmed Efendi’yi vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran-alâ-îsâihî vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hüseyin Çelebi b. Mehmed ve Mustafa b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb kayd şüd. Fî 28 min-Cumâdelûlâ sene 1110. Şuhûdü’l-hâl: Mehmed Efendi b. Abdüllatif, Kayyım Mustafa Çelebi b. Osman, el-Hâc Mustafa b. Ömer, Süleyman Beşe b. Derviş, Mustafa Çelebi b. Mehmed Efendi, İbrahim Çelebi b. Hasan, Derviş Bey b. Mustafa