Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 771 Hüküm no: 622 Orijinal metin no: [143b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin vefat eden Mesud Mehmed Efendi’deki sulh bedeli karşılığı olan alacağının terekeden ödenmesi Mahmiye-i İstanbul’da Molla Aşkī mahallesinde sâkin bâ‘isü’l-kitâb Mustafa Çelebi b. Ramazan meclis-i şer‘de mahalle-i mezbûre ahâlîsinden olup mahrûse-i Edirne’de vefât eden Mesud Mehmed Efendi b. Mustafa b. İbrahim’in tesviye-i umûruna kıbel-i şer‘den mansûb vasîsi olmağla terekesine vaz‘-ı yed eden Abdullah Ağa b. Şa‘bân mahzarında üzerine da‘vâ ve takrîr-i kelâm edip müteveffâ-yı mezbûr Mesud Mehmed Efendi b. Mustafa b. İbrahim zimmetinde yedimden iştirâ ve kabz eylediği iki vukıye od bahâsından doksan guruş ve emri ile âhardan iştirâ ettirdiğim eczâ? bahâsından doksan beş guruş ki cem‘an yüz seksen beş guruş hakkım olup hattâ müteveffâ-yı mezbûr ile bin yüz yedi senesi Şa‘bân’ında mahalle-i mezbûrede vâki‘ kendi bahçesinde hesâb gördüğümüzde ciheteyn-i merkūmeteynden cem‘an yüz seksen beş [guruş] zimmetinde bana edâsı vâcib deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden el-Hâc İlyas mahallesinde sâkin mekteb hocası İbrahim Efendi b. Mehmed ve Beyceğiz mahallesinde Çavuşlar Kâtibi Osman Efendi’nin menzilinde sâkin Osman b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mesud Mehmed Efendi b. Mustafa b. İbrahim hayâtında târîh-i merkūmda kendi bahçesinde işbu müdde‘î-i mezbûr ile hesâb gördüğümde ciheteyn-i merkūmeteynden cem‘an yüz seksen beş guruş müdde‘î-i mezbûra zimmetimde edâsı vâcib deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın [144a] vasiyy-i mezbûr da‘vâmı def‘ edip işbu müdde‘î-i mezbûr meblağ-ı merkūm yüz seksen beş guruş da‘vâsından benim ile huzûr-ı Müslimînde seksen guruş üzerine sulh olup mâ‘adâ yüz beş guruş da‘vâsından müteveffâ-yı mezbûrun zimmetini ibrâ ve ıskāt etmişdi deyü def‘le mukābele ve istintâk olunsun dedikde gıbbe’l-istintâk ve’l-inkâr vasiyy-i mezbûrdan def‘-i mezkûruna beyyine taleb olundukda udûl-ı Müslimînden mahmiye-i mezbûrede Ali Paşa müezzini Mustafa Efendi b. Ahmed ve Hocapaşa mahallesinde sâkin Hammâmî Ali Ağa b. Ömer li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘î-i mezbûr Mustafa Çelebi ciheteyn-i merkūmeteynden cem‘an yüz seksen beş guruş da‘vâ edip vasiyy-i mezbûr ile seksen guruş üzerine huzûrumuzda sulh olunup mâ‘adâ yüz beş guruş da‘vâsından müteveffâ-yı mezbûrun zimmetini huzûrumuzda ibrâ ve ıskāt eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince bedel-i sulh olan seksen guruşu müteveffâ-yı mezbûrun terekesinden müdde‘î-i mezbûra edâya vasiyy-i mezbûra tenbîh olundukdan sonra mâ‘adâ yüz beş guruş da‘vâsıyla vasiyy-i mezbûra bî-vech mu‘ârazadan müdde‘î-i mezbûr men‘ birle mâ-vaka‘a kayd şüd. Fî 11 min-Cumâdelâhire sene aşer ve mi’e ve elf. Şuhûdü’l-hâl: Fahrü’l-müderrisîn es-Seyyid Abdullah Efendi b. es-Seyyid Ahmed, İbrahim Ağa b. el-Hâc Mehmed, Hüseyin Ağa b. İbrahim, Mustafa Çavuş el-mübâşir