Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 805 Hüküm no: 651 Orijinal metin no: [150a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed, Mehmed ve Mustafa efendilerin vefat eden İbrahim Efendi’nin kendilerine vasiyet ettiği parayı vasiden teslim aldıkları Müderrisînden olup mahmiye-i İstanbul’da Şehzâde Medresesi hucurâtının birinde sâkin iken bundan akdem vefât eden İbrahim Efendi b. Mahmud b. Abdullah’ın ber-vech-i âtî mûsâ-lehleri olup medrese-i mezbûre sâkinlerinden işbu ashâbü’l-kitâb Ahmed Efendi b. Mehmed ve Mehmed Efendi b. Ali ve es-Seyyid Mustafa Efendi b. Mehmed mahfil-i kazâda müteveffâ-yı mezbûrun tesviye-i umûruna vasiyy-i muhtârı olmağla terekesine vaz‘-ı yed eden eş-Şeyh Mustafa Efendi b. Mustafa mahzarında herbiri üzerine da‘vâ ve takrîr-i kelâm edip müteveffâ-yı mezbûr İbrahim Efendi b. Mahmud b. Abdullah hasta ve alîl olduğu hâlde fevtinden bir gün mukaddem bi-emrillâhi te‘âlâ fevtimden sonra cemî‘ terekem ahz olunup içinden vech-i mesnûn üzere levâzım-ı techîz ve tekfînim görüldükden sonra terekemin sülüsü ifrâz olunup sülüs-i mezbûrdan yirmi guruş ile iskāt-ı salât oluna ve on guruş dahi hizmetimde olan Mehmed Ağa b. Yusuf’a verile ve iki guruş vasiyy-i mezbûr Mustafa Efendi’ye ve ikişer guruş nâzırlarım Kasım Efendi b. Ali ve Hasan Efendi b. Hüseyin’e verile ve bâkī kalan sülüs bize ve medrese-i mezbûrede ma‘lûmü’l-eşhâs efendilere verile deyü vasiyet edip musırran alâ-îsâihî fevt oldukda vesâyâ-yı mu‘ayyenesinden fazlasını vasiyy-i mezbûr bize teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve zikr olunan müdde‘îlerin ber-vech-i mübeyyen müdde‘âlarını inkâr edicek zikr olunan müdde‘îlerden müdde‘âlarına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Ekmekçizâde Medresesi’nde sâkin es-Seyyid Mehmed Efendi b. Osman ve Zeyni Çelebi Medresesi’nde sâkin Mehmed Efendi b. Ahmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr İbrahim Efendi b. Mahmud b. Abdullah hasta ve alîl oldukda fevtinden bir gün mukaddem bi-emrillâhi te‘âlâ fevtimden sonra cemî‘ terekem ahz u kabz olunup içinden vech-i mesnûn üzere levâzım-ı techîz ve tekfînim görüldükden sonra bâkī kalan terekemin sülüsü ifrâz olunup sülüs-i mezbûrdan yirmi guruş iskāt-ı salât oluna ve on guruş dahi hizmetimde olan Mehmed Ağa b. Yusuf’a ve iki guruş vasiyy-i mezbûra ve ikişer guruş nâzırlarıma verile ve bâkī kalan sülüs medrese-i mezbûre sâkinlerinden zikr olunan müdde‘îler ile sâir ma‘lûmü’l-esâmî ve meşhûrü’l-eşhâs efendilere verile deyü huzûrumuzda vasiyet ve musırran alâ-îsâihî vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm zikr olunan müdde‘îler yine meclis-i şer‘de vasiyy-i mezbûr muvâcehesinde herbiri ikrâr ve takrîr-i kelâm edip müteveffâ-yı mezbûrun terekesinin sülüsü işbu defter-i kassâm nâtık olduğu üzere iki yüz otuz altı buçuk guruşa bâliğ olup meblağ-ı mezbûrdan vesâyâ-yı mu‘ayyenesi îfâ olundukdan sonra bâkī iki yüz buçuk guruş terekesinin sülüsünden olmak üzere asâleten ve sâir müştereklerimiz taraflarından sâbitü’l-vekâle vekîlleri olmağla vekâleten vasiyy-i mezbûr yedinden tamâmen ahz u kabz eyledik dediklerinde gıbbe’t-tasdîk mâ-vaka‘a kayd-şüd. Fî 25 min-şehr-i mezbûr li-seneti’l-mezbûre. Şuhûdü’l-hâl: Ahmed Efendi b. Mehmed Efendi, Uşşâkī Mehmed Efendi, <>, Şeyh Mustafa Efendi.