Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 807 Hüküm no: 652 Orijinal metin no: [150a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın vefat eden babası Elmas Mehmed Paşa’nın bazı eşyalarını kendisine hibe ettiği iddiasını ispat edemediği Hilâl-i sütûrda mezkûr olan husûsun mahallinde istimâ‘ ve tahrîri iltimâs olunmağın bu fakīr Âsitâne-i sa‘âdetde Sadâret-i Uzmâ kāimmakāmı olan düstûr-ı mükerrem Yusuf Paşa hazretlerinin Alayköşkü kurbünde saray-ı âlîlerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm olundukda asrında sadrazam olup bin yüz dokuz senesinde vâki‘ sefer-i hümâyûnda Senta nâm mevzi‘de Nemçe taburu muhârebesinde şehîden vefât eden Elmas Mehmed Paşa b. Abdurrahman Ağa’nın kerîme-i mükerremeleri sagīre Âişe Hanım’ın vasiyy-i mansûbu Bezzâzistânî el-Hâc Halil Ağa b. el-Hâc Mehmed meclis-i ma‘kūd-ı mezbûrda vezîr-i müşârün-ileyhin düyûnu terekesinden ezyed olmağla tesviye-i umûruna kıbel-i şer‘den vasî ve kayyım nasb olunan Telhîsî Abdullah Ağa b. Mehmed mahzarında üzerine da‘vâ ve takrîr-i kelâm edip merhûm-ı müşârün-ileyh bin yüz sekiz senesinde sefer-i hümâyûna gider olduğu hâlde mahrûse-i Edirne’de saray-ı âlîlerinde işbu yedimde olan sûret-i defter nâtık olduğu üzere mahmiye-i İstanbul’da mahlûta ve mazbûta olan eşyâ-i memlûkesinden bir mikdâr eşyâsını vasîsi olduğum kerîme-i mükerremeleri Âişe Hanım’a hîbe ve temlîk eyledim deyü huzûr-ı Müslimînde ikrâr ve işhâd eyledikden sonra fevt olmağla vasiyy-i mezbûr Abdullah Ağa terekeden olmak üzere eşyâ-i mezkûreye vaz‘-ı yed eder suâl olunsun dedikde gıbbe’s-suâl ve’l-inkâr müdde‘î-i mezbûr el-Hâc Halil Ağa’dan müdde‘âsına beyyine taleb olundukda ityân-ı beyyineden izhâr-ı acz etmekle mezbûr Halil Ağa bilâ-beyyine bî-vech mu‘ârazadan men‘ birle mâ-vaka‘a kayd-şüd. Fî 18 min-Cumâdelâhire sene 1110 Şuhûdü’l-hâl: Büyük Tezkireci Hâfız Mehmed Efendi, Bostan Ağası Mehmed Ağa, Ahmed Efendi b. Mehmed, Ahmed Çelebi b. Süleyman, Nasuh Çukadâr, Mehmed Ağa b. ( ).