Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 818 Hüküm no: 664 Orijinal metin no: [152b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden kocası Yusuf Efendi’de mehir alacağı olduğunu ispat ettiği [Mahmiye-i] İstanbul’da Tercümân Yunus mahallesi ahâlîsinden olup sâbıkā Medîne-i münevvere kādısı iken bundan akdem vefât eden Yusuf Efendi b. Halil b. Abdurrahman’ın zevce-i menkûha-i metrûkesi olup mahalle-i mezbûrede sâkine Âişe Hatun bt. el-Hâc Mehmed b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân merhûm-ı mezbûrun etbâ‘ından olup mahmiye-i mezbûrede Ali Paşa mahallesinde sâkin Hacı Ömer b. Mustafa ve el-Hâc Mustafa b. Ahmed şehâdetleriyle mahzar-ı hasm-ı câhidde şer‘an sâbit olan Ahmed Efendi b. Mustafa meclis-i şer‘de merhûm-ı mezbûrun kebîr oğlu olmağla terekesine vaz‘-ı yed eden Abdurrahman Efendi mahzarında bi’l-vekâle üzerine da‘vâ ve takrîr-i kelâm edip merhûm-ı [mû]mâileyh Yusuf Efendi b. Halil b. Abdurrahman hayâtında müvekkilem mezbûre Âişe Hatun’u yüz guruş mehr-i müeccel tesmiyesiyle huzûr-ı Müslimînde tezevvüc ve kabûl edip hattâ merhûm-ı mezbûr hâl-i kemâl-i sıhhatinde Medîne-i münevvere’de zevcem Âişe Hatun’a zimmetimde mütekarrir ve ma‘kūdun-aleyh yüz guruş deynim vardır deyü huzûr-ı Müslimînde ikrâr ve işhâd edip kable’l-edâ fevt olup terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsına beyyine taleb olundukda udûl-ı Müslimînden ve merhûm-ı mezbûrun müddet-i mezbûrede yanında mevcûd olan etbâ‘ından mu‘arrefân-ı mezbûrân el-Hâc Ömer b. Mustafa ve el-Hâc Mustafa b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Yusuf Efendi b. Halil b. Abdurrahman hâl-i kemâl-i sıhhatinde Medîne-i münevvere’de müvekkile-i mezbûre içün zevcem Âişe Hatun’a zimmetimde mütekarrir ve ma‘kūdun-aleyh yüz guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf li-müvekkile-i mezbûre mûcebiyle ba‘de’l-hükm kayd-şüd. Fî 2 min-Cumâdelâhire sene 1110. Şuhûdü’l-hâl: Abdurrahim Efendi b. Ahmed, Hüseyin Çelebi b. Hamza, Kara Mehmed b. Hüseyin, İbrahim Ağa b. Hüseyin.