Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 819 Hüküm no: 665 Orijinal metin no: [152b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in vefat eden Tütüncü Ömer Beşe’de olan alacağını tahsil ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Velizâde Mehmed Efendi mahmiye-i İstanbul’da Küçükpazarı kurbünde Hoca Hayreddin mahallesinde sâkin iken bundan akdem vefât eden Duhânî Ömer Beşe b. Hüseyin’in Tahtakale’de vâki‘ mahzenine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde tüccâr tâifesinden Rüstem Paşa Câmi‘-i şerîfi kurbünde Nerdü[ba]nlı odalarının birinde sâkin hâfizü’l-kitâb el-Hâc Mehmed b. Mustafa meclis-i ma‘kūd-ı mezbûrda müteveffâ-yı mezbûrun evlâd-ı sıgārı Fâtıma ve Ali ve Mustafa’nın vâlideleri ve tesviye-i emrlerine kıbel-i şer‘den mansûbe vasiyeleri olup tereke-i müteveffâ-yı mezbûra vâzı‘atü’l-yed olup müteveffâ-yı mezbûrun zevce-i menkûhası Râbia Hatun bt. Mehmed b. Ahmed tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûrede sâkin Abdurrahman b. Ahmed ve Mehmed b. Ahmed şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan el-Hâc Ali Ağa b. Veliyüddin mahzarında üzerine da‘vâ ve takrîr-i kelâm edip müteveffâ-yı mezbûr Ömer Beşe b. Hüseyin b. Veliyüddin zimmetinde vezni ve kıymeti ilm-i şer‘î ile ma‘lûm yedimden müşterâ ve makbûz kahve semeninden ba‘de külli’l-hesâb işbu yedimde olan imzâlı deyn temessüğü mûcebince iki yüz yedi guruş ve on altı para hakkım olup hattâ müteveffâ-yı mezbûra hayâtında meblağ-ı mezbûr cihet-i mezbûreden bana ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden Süleymaniye kurbünde Sarı Bayezid mahallesinde sâkin Kettânî el-Hâc Hasan b. Abdullah ve Mehmed Çelebi b. Ahmed li-ecli’ş-şehâde meclis-i ma‘kūd-ı mezbûra <> hâzırân olup isre’l-istişhâd fi’l-vâki‘ müteveffâ-yı mezbûr Duhânî Ömer Beşe b. Hüseyin b. Veliyüddin hayâtında müdde‘î-i mezbûra cihet-i mezbûreden zimmetinde iki yüz guruş ve on altı para deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mer‘î mûcebiyle ba‘de’l-hükm müdde‘î-i mezbûr yine meclis-i ma‘kūd-ı mezbûrda merkūm el-Hâc Ali Ağa mahzarında ikrâr edip ânifen edâsına hükm-i şer‘î lâhık olan iki yüz guruş ve on altı parayı tamâmen alıp kabz eyledim dedikde gıbbe’t-tasdîkı’l-mer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr el-Hâc Süleyman b. Hasan ve Hasan b. Abdullah <> meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 23 min-Cumâdelâhire sene 1110 Şuhûdü’l-hâl: el-Hâc Ebubekir Ağa b. İbrahim, Süleyman Çelebi b. Ahmed, Hasan Beşe b. Ahmed, Hasan Beşe b. Süleyman, el-Hâc Mehmed b. Muharrem.