Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 820 Hüküm no: 666 Orijinal metin no: [152b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in vefat eden Tütüncü Ömer Beşe’nin dükkânını, içindeki mallarıyla birlikte satın aldığı Kezâlik meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Râbia bt. Mehmed’e ve babası Hüseyin b. Ve[liyyü]ddin’e ve evlâd-ı sıgārı Fâtıma ve Ali ve Mustafa’ya münhasıra ve tashîh meselesi yüz yirmi sehmden olmağın sihâm-ı mezbûrenin on beş sehmi zevcesi mezbûreye ve yirmi sehmi babası mezbûra ve bâkī seksen beş sehmin on dört sehmi kızı mezbûreye [153M/a] ve otuz dörder sehmi oğulları mezbûrândan herbirine isâbeti tahakkukundan sonra zikr olunan Hüseyin nâm âmilin hisse-i mevkūfesini ahz u kabz [ve] zabta ve sıgār-ı mezbûrûnun tesviye-i emrlerine kıbel-i şer‘den mansûbe vasiyeleri ve vâlideleri mezbûre Râbia bt. Mehmed b. Abdullah tarafından husûs-ı âti’l-beyânda ahz u kabz [ve] zabta ve kendüye îsâle vekîl ol dahi (olduğu) zât-ı mezbûreyi ma‘rifet-i şer‘iyye ile ârifân mahalle-i mezbûre ahâlîsinden Abdurrahman Beşe b. Ahmed ve Mehmed Çelebi b. Ahmed şehâdetleriyle mahzar-ı hasm-ı câhidde şer‘an vekâletine hükmolunan Üskübî mahallesinde sâkin el-Hâc Ali Ağa b. Veliyüddin meclis-i ma‘kūd-ı mezbûrda Rüstem Paşa Câmi‘-i şerîfi kurbünde Nerdübanlı odalarının kurbünde sâkin bâ‘isü’l-kitâb el-Hâc Mehmed b. Mustafa mahzarında bi’l-vekâle ikrâr ve takrîr-i kelâm edip müteveffâ-yı mezbûrun zikr olunan Tahtakale’de tütüncü mahzeninde mevcûd yenice ve basma dizi ta‘bîr olunur duhânı mûceb-i şer‘le tahrîr ve vezn olundukda her vukıyesi seksener sağ akçe olmak üzere bin beş yüz vukıye duhânı bir yük yirmi bin sağ akçeye mezbûr el-Hâc Mehmed’e bi-safkatin vâhidetin bey‘ u teslîm ve temlîk ol dahi ber-vech-i muharrer iştirâ ve tesellüm ve kabz eyledikden sonra zikr olunan mahzende mevcûd ma‘lûmü’l-vezn tütün hakları da‘vâya ...? ve ma‘lûmü’l-vezn duhân ve satır ve taş ve iki ağaç pîştahta ve dört buçuk vukıye ma‘a vezne ve bir kebîr ve bir sagīr iki kantar ve bir tekne ve bir kıyma tahtası ve bir sagīr minder ve bir yastık ve bir köhne hasır ve sâir mahzen ve dükkân içinde mevcûd cümle eşyâsını ba‘zı Müslümanlar takvîm ve tahmînleri ile on yedi bin iki yüz sağ akçeye takvîm eylediklerinden sonra tarafeynden îcâb ve kabûlü hâvî bey‘-i kat‘î ile <> mezbûr el-Hâc Mehmed’e bey‘ u teslîm ol dahi iştirâ ve temellük ve kabûl ve kabz eyledikden sonra semeni olan meblağ-ı mezbûr on bin iki yüz akçe ile mukaddemâ zikr olunan bir yük yirmi bin akçeyi merkūm el-Hâc Mehmed yedinden alıp kabz eyledim ba‘de’l-yevm zikr olunan bin beş yüz vukıye duhân ve eşyâ-i muharrere-i mezbûre mezbûr el-Hâc Mehmed’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîk vâki‘ hâli ilâ-âhirihî. Şuhûdü’l-hâl: Es-sâbikūn.