Bab Mahkemesi 54 Numaralı Sicil (H. 1102 / M. 1691) cilt: 20, sayfa: 64 Hüküm no: 20 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avadik v. Arakil’in Dikos v. Barak’dan vergi tahsili Medîne-i Kayseriye’de Kostere nâhiyesine tâbi‘ Vekse nâm karye ahâlîsinin beher sene edâsı lâzım gelen tekâlîf-i örfiyyesini cem‘a me’mûr olan kethüdâ yeri ve vekîlleri Avadik v. Arakil nâm Ermeni meclis-i şer‘-i kazâ-i lâzımü’r-rızâda karye-i mezbûre ahâlîsinden Dikos v. Barak nâm Ermeni muvâcehesinde ikrâr-ı tâm ve takrîr-i kelâm edip, bin yüz bir senesi ve iki yüz iki senesinde merkūm Dikos üzerine lâzım gelen tekâlîf-i ma‘lûmeden tecemmu‘ olan on sekiz guruşu bundan akdem merkūm Dikos’dan taleb eylediğimde, ol dahi tahmîninden ziyâdedir deyu nizâ‘ etmekle, ben dahi meblağ-ı mezbûrdan ancak altı guruş merkūm Dikos yedinden ahz u kabz edip, meblağ-ı bâkī on iki guruş mütâlebesinden ben fâriğ oldum. Ba‘de’l-yevm târih-i kitâba gelince üzerine edâsı lâzım gelen cizye ve ispençe ve sâir tekâlîf-i örfiyyeden merkūm Dikos zimmetinde bir akçe ve bir habbe bâkī kal[ma]mışdır dedikde, vâki‘ hâl hıfzan li’l-makāl bi’t-taleb ve’l-ibtigā ketb olundu. Fi’l-yevmi’l-ışrîn min şehri Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mustafa b. Şaban, Ebûbekir b. Hüseyin, Ali b. Bâli, Ahmed b. Ahmed el-muhzır.