Bab Mahkemesi 54 Numaralı Sicil (H. 1102 / M. 1691) cilt: 20, sayfa: 64 Hüküm no: 21 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Abdülkayyum’un evini Yeniçeriler 25. Cemâat Oda Vakfı’na bey‘ bi’l-istiğlâl yoluyla satması Dergâh-ı âli -dâme mahfûfen bi’l-me‘âlî- yeniçerilerinin yirminci ağa bölüğüne mahsûs odanın çorbacısı olan Mustafa Ağa b. Abdülkayyum tarafından husûs-ı âti’l-beyâna vekîl olduğu Pîrî Ağa b. İbrahim ve Hüseyin Beşe b. Süleyman şehâdetleriyle sâbit olan Halil Çelebi b. Abdullah meclis-i şer‘-i şerîf-i enverde, yine dergâh-ı âlî yeniçerilerinin yirmi beşinci cemâ‘at odasına mahsûs nukūd-ı mevkūfenin bi’l-fi‘il mütevellîsi olan işbu râfi‘ü’l-kitâb Ahmed Beşe b. Oruç mahzarında ikrâr ve takrîr-i kelâm edip, müvekkilim mezbûr Mustafa Ağa’nın yedinde mülkü olup, mahmiye-i İstanbul’da Yenibahçe kurbunda Karabaş mahallesinde vâki‘ bir tarafdan el-Hâc İbrahim Ağa mülkü ve bir tarafdan Hasan Beşe menzili ve bir tarafdan İsmail Efendi menzili ve bir tarafdan tarîk-i âm ile mahdûd, fevkānî üç bâb oda ve tahtânî bir bâb oda ve bir sofa ve bir kenîf ve bi’r-i mâ ve avluyu müştemil mülk menzilini, cemî‘ tevâbi‘ ve levâhıkı ile mütevellî-i mezbûr Ahmed Beşe’ye iki yüz elli yedi guruşa bi tarîki’l-istiğlâl bey‘ edip, ol dahi yedinde olan mâl-ı vakf-ı mezbûr ile ber vech-i muharrer iştirâ ve kabûl edip, semen-i mezkûr iki yüz elli esedî guruşu mütevellî-i mezbûr yedinden tamâmen ahz u kabz eylediğinden sonra menzil-i mezbûrda mevcûd esâs-ı beyt ve evân[î]-i nühâsiye ve gayr-ı nühâsiye ve melbûsât ve mefrûşât cemî‘ eşyâsını mütevellî-i mezbûra emânet vaz‘ edip, menzil-i mezbûru kendiye emânet vaz‘ olunan metâ‘la kabza izin verdiğinden sonra ol dahi menzil-i mezbûru ve metâ‘ı merkūmu ma‘an kabz edip, ol vechile tahliye ve tekābuz-ı şer‘î olundukdan sonra mütevellî-i mezbûr menzil-i mahdûd-ı mezkûru târih-i kitâbdan bir sene tamâmına değin yirmi beş guruşa bana îcâr ve teslîm, ben dahi istîcâr ve tesellüm ve kabûl eyledim dedikde, gıbbe’t-tasdîki’l-mu‘teberi’l-vicâhî, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Cemâziyelevvel li sene isneteyn ve mi’e ve elf. Şuhûdü’l-hâl: Pîr Çelebi b. ( ), Hasan Odabaşı b. ( ), Hüseyin Odabaşı b. ( ), Hüseyin Beşe b. ( ), Vekîl-i harczâde Mustafa, İbrahim Çelebi b. Ahmed.