Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 821 Hüküm no: 667 Orijinal metin no: [153M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Fatıma Hatun’un varislerinin miras ibrası Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Velizâde Mehmed Efendi mahmiye-i İstanbul’da Cerrâh Paşa Câmi‘-i şerîfi kurbünde Kürkçü mahallesinde sâkine Hanife Hatun bt. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkine iken bundan akdem vefât eden Fâtıma Hatun bt. Mehmed’in verâseti zevc-i metrûku Ömer Bey b. Mustafa ile kebîre kızı mezbûre Hanife Hatun’a münhasıra olup ve tashîh-i meselesi dört sehmden olup sihâm-ı mezbûrenin bir sehmi farzen ve redden mezbûr Ömer Bey’e ve üç sehmi kızı mezbûre Hanife’ye isâbeti tahakkukundan sonra mezbûr Ömer Bey meclis-i ma‘kūd-ı mezbûrda tereke-i müteveffâ-yı mezbûreye bi’l-verâse vaz‘-ı yed edip zâtı ta‘rîf-i şer‘î ile mu‘arrefe olan râfi‘atü’l-kitâb mezbûre Hanife Hatun mahzarında ikrâr ve takrîr-i kelâm edip zevcem müteveffât-ı mezbûre Fâtıma Hatun’un terekesi ma‘rifet-i şer‘le tahrîr ve ba‘de ihrâci’l-mesârif mecmû‘-ı terekesinden tashîh-i mezbûr üzere benim hissem mukābelesinde bana isâbet eden para üç akçe hesâbı üzere bin sekiz yüz doksan yedi akçe hakkımı terekeden olmak üzere mezbûre Hanife yedinden tamâmen alıp kabz eyledim min-ba‘d meblağ-ı mezbûrdan mezbûre Hanife Hatun yedinde bir akçe ve bir habbe hakkım bâkī kalmadı tereke-i müteveffât-ı mezbûreden husûs-ı mîrâsa müte‘allıka âmme-i da‘vâdan mezbûre Hanife Hatun’un zimmetini bi’l-verâse ibrâ ve iskāt eyledim dedikde gıbbe’t-tasdîkı’ş-şer‘î mezbûre Hanife Hatun meclis-i ma‘kūd-ı mezbûrda mezbûr Ömer Bey mahzarında ikrâr ve takrîr-i kelâm edip vâlidem müteveffât-ı mezbûrenin terekesinden tashîh-i mezbûr üzere üç sehm mukābelesinde bana isâbet eden be-hesâb-ı sağ beş bin altı yüz doksan üç akçeyi mezbûr Ömer Bey yedinden tamâmen alıp kabz ve ahz ü istîfâ eyledim min-ba‘d meblağ-ı mezbûrdan bir şey kalmayıp mezbûr Ömer Bey’in zimmetini ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Hasan Çelebi b. Abdullah ve Mehmed b. Ahmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 11 min-Cumâdelâhire sene 1110 Şuhûdü’l-hâl: Mesud Efendi b. ( ) el-İmâm, İbrahim Çelebi b. Mehmed, Mehmed Çelebi b. İsmail, Mustafa Çelebi b. el-Hâc Şa‘bân