Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 822 Hüküm no: 668 Orijinal metin no: [153M/a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühürdar Hasan Ağa’nın varislerinin, mûrislerinin alacağının tahsiline vekil tayinleri Mahmiye-i İstanbul’da Süleyman Ağa mahallesinde sâkinen fevt olan Mühürdâr Hasan Ağa b. Mustafa’nın babası mezbûr Mustafa’ya Hasan b. Mehmed asâleten ve müteveffâ-yı mezbûrun evlâd-ı sıgārı Mehmed ve Mahmud ve Âişe’nin vasiye-i mansûbeleri olup zâtı ba‘de’t-ta‘rîfi’ş-şer‘î Emine Hatun bt. Abdullah b. Abdullah vesâyeten meclis-i şer‘de müteveffâ-yı mezbûrun karındaşı râfi‘ü’l-kitâb Mehmed Ağa b. Mustafa mahzarında herbiri ikrâr ve takrîr-i kelâm edip merhûm-ı mezbûrun mahrûse-i Edirne’de olan terekesine vaz‘-ı yed edenlerden taleb-i da‘vâ ve ahz [ü] kabza ve bize îsâle ve vilâyet-i Anadolu’da Aydın sancağında Nazilli kazâsında ma‘lûmü’l-esâmî re‘âyâ zimmetlerinde olan malı dahi tahsîl ve ahz ve bize îsâle ve kabz [ve] îsâl mütevakkıf olan umûrun küllîsine tarafım[ız]dan mezbûr Mehmed Ağa’yı vekîl eyledik ol dahi ba‘de’l-kabûl mezbûrân Mustafa ve Emine yine vekîl-i mezbûr mahzarında ikrâr edip mezbûr Mehmed Ağa’nın harcırâh ve sâir mesârifi ücreti içün tahsîl eylediği malımdan her yüz guruşda otuz guruş nısfı mezbûr Mustafa’nın ve nısfı sıgār-ı mezbûrûnun hisselerinden mezbûr Mehmed Ağa’ya vermeğe herbirimiz ta‘ahhüd eyledik de[di]klerinde mâ-vaka‘a kayd-şüd. Fî 20 min-Cumâdelâhire sene 1110 Şuhûdü’l-hâl: Yusuf Efendi b. Veli, İbrahim Ağa b. Kethüdâ, Solakzâde Mustafa, Pîrîoğlu Mehmed