Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 822 Hüküm no: 669 Orijinal metin no: [153M/b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhâncı Ömer Beşe’nin küçük çocuklarına vasi tayini Mahmiye-i İstanbul’da Küçükpazar kurbünde Hoca Hayreddin mahallesinde sâkin iken bundan akdem vefât eden Duhânî Ömer Beşe b. Hüseyin b. Veliyüddin’in verâseti zevce-i menkûha-i metrûkesi Râbia Hatun bt. Mehmed’e ve babası olup diyâr-ı âharda olan mezbûr Hüseyin b. Veliyüddin nâm gāibe ve sagīre kızı Fâtıma’ya ve sagīr oğulları Ali ve Mustafa’ya münhasıra ve tashîh-i meselesi yüz yirmi sehmden olmağla sihâm-ı mezkûrenin on beş sehmi zevcesi mezbûre Râbia’ya ve yirmi sehmi babası gāib-i mezbûra ve bâkī seksen beş sehmin on yedi sehmi kızı sagīre-i mezbûreye ve otuz dörder sehmi oğulları mezbûrân Ali ve Mustafa’dan herbirine isâbet ve intikāl eylediği şer‘an zâhir ve müte[be]yyin oldukdan sonra gāib-i mezbûrun tashîh-i mezbûr üzere südüs hisse-i irsiyesini ahz u kabz ü hıfza ve sıgār-ı mezbûrûnun tesviye-i emrlerine kıbel-i şer‘-i enverden bir vasî ve kayyım nasbı lâzım ve mühim olmağın emânet ve diyânet ile ma‘rûfe olup vesâyete her vechile ehil olduğu zeyl-i vesîkada isimleri mastûr Müslimîn haberleriyle lede’ş-şer‘i’ş-şerîf zâhire olan sıgār-ı mezbûrûnun vâlideleri ve hâdineleri olup zâtı ta‘rîf-i şer‘î ile mu‘arrefe bâ‘isetü’l-kitâb mezbûre Râbia Hatun bt. Mehmed’i hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri gāib-i mezbûrun hissesini ahz u kabz u zabta ve tesviye-i umûr-ı sıgār-ı mezbûrîne vakt-i rüşd ü sedâdlarına varınca vasiye nasb ü ta‘yîn buyurduklarında ol dahi vech-i muharrer üzere vesâyet-i mezbûreyi kabûl ve merâsimini kemâ-yenbağī edâya müte‘ahhide olmağın mâ hüve’l-vâki‘ bi’t-taleb ketb olundu. Fî gurre-i Cumâdelâhire sene 1110. Şuhûdü’l-hâl: el-Hâc Ali Ağa b. Veliyüddin, Abdurrahman Beşe b. Ahmed, el-Hâc Ebubekir b. İbrahim, Hüseyin Beşe b. Mustafa, Mehmed Çelebi b. Ahmed, Mustafa Ağa b. Ali.