Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 830 Hüküm no: 675 Orijinal metin no: [154a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedik Mehmed Ağa’nın vefat eden Tütüncü Ömer Beşe’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Mehmed Efendi b. Ve[liyyü]ddin mahmiye-i İstanbul’da Zindankapısı kurbünde tüccâr-ı zevi’l-iktidârdan fahrü’l-akrân el-Hâc Ali Ağa b. Veliyüddin’in sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf ettikde mahmiye-i mezbûrede Bahçekapısı kurbünde Elvanzâde mahallesinde sâkin bâ‘isü’l-kitâb Gedik Mehmed Ağa b. Maksud meclis-i ma‘kūd-ı mezbûrda Küçükpazar kurbünde Hoca Hayreddin mahallesinde sâkin iken bundan akdem vefât eden Duhânî Ömer Beşe b. Hüseyin b. Veliyüddin’in zevce-i menkûha-i metrûkesi ve evlâd-ı sıgārı Fâtıma ve Ali ve Mustafa’nın tesviye-i emrlerine kıbel-i şer‘den mansûbe vasiyeleri Râbia bt. Mehmed b. Ahmed tarafından husûs-ı âti’l-beyânda müseccel vekîli olmağla tereke-i müteveffâ-yı mezbûreye vaz‘-ı yed eden merkūm el-Hâc Ali Ağa mahzarında üzerine da‘vâ ve takrîr-i kelâm edip müteveffâ-yı mezbûr Duhânî Ömer Çelebi b. Hüseyin b. Veliyüddin’in zimmetinde cihet-i karzdan yüz otuz guruş hakkım olup hattâ müteveffâ-yı mezbûr Ömer Beşe hâl-i sıhhatinde fevtinden sekiz ay mukaddem cihet-i mezbûreden bana vâcibü’l-edâ zimmetinde ol kadar guruş deyni olduğunu huzûr-ı Müslimînde ikrâr ve işhâd dahi edip meblağ-ı mezbûrun bi’d-defa‘ât sekiz buçuk guruşunu hayâtında yedinden ahz u kabz edip bâkī yüz yirmi bir buçuk guruşunu kable’l-edâ fevt olmağla terekesinden taleb ederim suâl olunsun dedikde gıbbe’s-suâl mezbûr el-Hâc Ali Ağa cevâbında terekesine vech-i muharrer üzere vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Hocapaşa mahallesinde sâkin Pazarcı Mustafa Beşe b. Hüseyin ve Ramazan Beşe b. Ahmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Duhânî Ömer Beşe b. Hüseyin b. Veliyüddin hâl-i sıhhatinde fevtinden sekiz ay mukaddem müdde‘î-i merkūm Gedik Mehmed Ağa b. Maksud’a cihet-i karzdan zimmetimde vâcibü’l-edâ yüz otuz guruş deynim vardır deyü ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın kabzına mu‘terif olduğu sekiz buçuk guruşdan mâ‘adâ yüz yirmi bir buçuk guruşu hayâtında müteveffâ-yı mezbûrdan küllen veyâ ba‘zan ahz u kabz veyâ hîbe veyâ âhara havâle veyâ turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine müdde‘î-i mezbûra yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince ba‘de’l-hükm mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Abdullah ve Nasuh Beşe b. Mehmed ile meclis-i şer‘a gelip alâ-vukū‘ihi takrîr etmeğin mâ-vaka‘a kayd-şüd. Fî 24 Cumâdelâhire li-sene 1110 Şuhûdü’l-hâl: el-Hâc Mehmed b. el-Hâc Ali, Hasan Beşe b. Osman, Hüseyin Çelebi b. Mustafa, Hasan Ağa b. Hüseyin, es-Seyyid el-Hâc Mehmed Beşe b. es-Seyyid Hüseyin.