Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 831 Hüküm no: 676 Orijinal metin no: [154a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Kadı Muharrem Efendi’nin varislerinden çocuklarının hisselerinin vasi tarafından ödenmesi Mahmiye-i İstanbul’da Yarhisar mahallesinde sâkin olup Medîne-i münevvere kādısı iken vefât eden merhûm Muharrem Efendi b. Mustafa’nın verâseti zevce-i metrûke[si] fahrü’l-muhadderât Şerife Âişe Hatun bt. el-mevlâ el-merhûm Nakībü’l-eşrâf es-Seyyid Cafer Efendi ile sagīre kızı Şerife Ümmügülsüm’e ve li-ebin karındaşı Ahmed Ağa’ya münhasıra oldukdan sonra mûmâ-ileyh es-Seyyid Cafer Efendi’nin sagīr oğlu Ahmed Çelebi ile sagīre kızı Şerife Saliha’nın vasiyy-i mansûbları fahrü’l-müderrisîn Murad Efendi b. Ali merhûm-ı müşârün-ileyh Muharrem Efendi’nin menzilinde akd olunan meclis-i şer‘-i şerîfde terekesine bi’l-verâse vaz‘-ı yed eden birâderi mezbûr Ahmed Ağa mahzarında üzerine bi’l-vesâye da‘vâ ve takrîr-i kelâm edip merhûm-ı mûmâ-ileyh Muharrem Efendi b. Mustafa hayâtında sagīrân-ı mezbûrân es-Seyyid Ahmed ve Şerife Saliha’nın vasiyy-i mahsûbları olmağla işbu defter-i kassâmda mastûr olan para dörder akçe hesâbınca cem‘an iki yük ile on altı bin <> yedi yüz yetmiş bir akçe hisse-i irsiyelerini kabz ve içinden beş bin yedi yüz seksen akçe ile mezbûr Seyyid Ahmed içün eşyâ alıverip ve otuz dört buçuk guruşunu nafaka ve kisveleri içün teslîm ve sarf edip bâkī iki yük ile beş bin dört yüz yetmiş bir akçesini kendi mesârifine sarfla istihlâk etmekle defter mûcebince sagīrân-ı mezbûrâna zimmetinde vâcibü’l-edâ deyni olup hattâ kemâl-i sıhhatinde yüz dokuz senesi Muharrem’inde medîne-i mezbûreye gider oldukda meblağ-ı mezbûr iki yük beş bin dört yüz yetmiş bir akçeyi kendi mesârifine sarfla istihlâk edip zimmetinde vâcibü’l-edâ sagīrân-ı mezbûrâna deyni olduğunu şuhûd mahzarında ikrâr ve işhâd etdiğinden sonra kable’l-edâ vefât etmeğin terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına muvâfık beyyine taleb olundukda merkūm-ı mûmâ-ileyhin mülâzımlarından olup mahalle-i mezbûrda sâkin Osman Efendi b. Mehmed Efendi ve kethüdâsı el-Hâc İbrahim Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka merhûm-ı mûmâ-ileyh Muharrem Efendi b. Mustafa hâl-i kemâl-i sıhhatinde yüz dokuz senesi Safer’inde Medîne-i münevvere’ye gider oldukda sagīrân-ı mezbûrân es-Seyyid Ahmed ve Şerife Saliha’nın işbu defter-i kassâmda mastûr olan para dört akçe hesâbınca cem‘an iki yük ile on altı bin yedi yüz yetmiş bir akçe hisse-i irsiyelerini kabz ve içinden beş bin iki yüz seksen akçe ile mezbûr es-Seyyid Ahmed Çelebi içün eşyâ alıverip ve otuz dört buçuk guruşu nafaka ve kisveleri içün teslîm ve sarf ve bâkī iki yük ile beş bin dört yüz yetmiş bir akçesini [154b] kendi mesârifine sarfla istihlâk edip meblağ-ı bâkī-i mezbûr sagīrân-ı mezbûrâna zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mûmâ-ileyhin husûs-ı mezbûrda sun‘u olmamağla tahlîf lâzım gelmemeğin mûcebince ba‘de’l-hükm ve’t-tenbîh mâ-vaka‘a kayd-şüd. Fî 15 Cumâdelûlâ sene 1110 Şuhûdü’l-hâl: Umdetü’l-mevâlî sâbıkā İzmir kādısı es-Seyyid Mehmed Efendi, Umdetü’l-müderrisîn Abdullah Efendi, el-Hâc Mustafa b. Mehmed, Mehmed Efendi b. Veli.