Bab Mahkemesi 54 Numaralı Sicil (H. 1102 / M. 1691) cilt: 20, sayfa: 65 Hüküm no: 22 Orijinal metin no: [3b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cemâatin işlerini gören Aritun Sahak’dan Ermenilerin memnun olduğu Dârü’l-hilâfeti’l-aliyye Kostantıniyye el-mahmiye’de vâki‘ altı cemâ‘at Ermenilerinin Meryem Ana cemâ‘atinden Nihabed v. Kirkor ve Ovanes v. Aydın? ve Haçador ve Karabet ve Agob v. Avadik ve Aritun v. Kiragos ve Bedros v. Toros ve Simon v. Agob ve David v. Murad ve Bağdasar v. Perzad ve Ovanes v. Kiragos ve Ferid? v. Asayi ve Karabet v. Ovanes ve Ovanes v. Asayi ve Abraham v. Kilazir? ve Sulu manastır cemâ‘atinden ve Ovanes v. Sakar ve Avakim v. Mardiros ve Asvador v. Yazıcan ve Ağya v. Asvador ve Devriş? v. Karabet ve Balat’da Elmas v. Andriyes ve Agob v. Serkis ve Mıgırdiç v. Minkar ve sâir cemâ‘atden ma‘lûmü’l-esâmi ve mahsûrü’l-eşhâs cemm-i gafîr ve cem‘-i kesîr ve tâife-i mezkûrenin papazlarından Başpapaz Semaven v. Papa Ovanes ve Papa Ohan v. Serkis ve Papa Agob v. Asvador ve Papa Abraham v. Delvet ve Papa Foytaras? v. Papa Mardiros ve sâirleri meclis-i şer‘-i şerîf-i enver ve mahfil-i dîn-i münîf-i ezherde, yine tâife-i mezbûreden işbu bâ‘isü’l-vesîka Aritun v. Karabet nâm Ermeni muvâcehesinde her biri takrîr-i kelâm ve ta‘bîr ani’l-merâm edip, mahmiye-i İstanbul ve tevâbi‘i Ermeni patriği tevcîh olunan altı cemâ‘atin mezbûr Aritun Sahak nâm Ermeni ile tevcîh cemâ‘at başları olmağla mersûm mîrîyi cem‘ ve tahsîl ve cânib-i mîrîye teslîm ve bi’l-cümle mukaddemâ yedlerine verilen hüccet-i şer‘iyyede mastûr olduğu umûru icrâya me’mûr olmağla, bu âna değin uhdesine lâzım gelen hidemâtı edâ etmeğin, ecânibden ba‘zı kimesneler merkūm Aritun bizden cem‘ ve tahsîl eylediği mâldan bir mikdârını kendi mesârifine sarfla istihlâk eyledi, deyu nizâ‘ etmekle, beynimizde ba‘zı ihtilâl vâki‘ olmuşdu. Lâkin husûs-ı mezbûr gayr-ı vâki‘ olup mezbûr Aritun’da bir akçe ve bir habbe alacağımız olmayıp, mezbûr Aritun hizmetinde kat‘â tekâsül etmeyip, cem‘ ve tahsîl olan rusûmu kabza me’mûr olanlara verip, adem-i hıyâneti mütehakkik olmağla ahvâl [4a] ve etvârından her birimiz râzî ve hoşnûd olup, kendi ile aslâ ve kat‘â da‘vâ ve nizâ‘ımız yokdur dediklerinde, gıbbe’t-tasdîk işbu vesîka gıbbe’l-ibtigā ketb ve imlâ olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim Çelebi b. Ahmed, Diğer İbrahim Çelebi b. Ahmed, Mustafa b. Şaban, Ali b. Bâli, Ebûbekir b. Hüseyin.