Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 833 Hüküm no: 678 Orijinal metin no: [154b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin vefat eden Fatıma Hatun’un vasisi olduğun ispat ettiği Husûs-ı câi’z-zikrin mahallinde istimâ‘ ve tahrîri iltimâs olunmağın cânib-i şer‘den Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Gül Câmi‘i <> mahallesinde Ali Beşe b. Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahalle-i merkūmede sâkine iken vefât eden Fâtıma bt. Abdullah b. Abdullah’ın vech-i âtî üzere vesâyâsını tenfîze vasiyy-i muhtârı olduğunu iddi‘â eden hâfizü’l-kitâb merkūm Ali Beşe meclis-i ma‘kūd-ı mezbûrda müteveffât-ı mezbûrenin zâhirde vâris-i ma‘rûfu olmamağla cemî‘ terekesi cânib-i beytülmâle âid olmak üzere mahmiye-i mezbûrede bi’l-fi‘il beytülmâli’l-hâs emîni umdetü’l-a‘yân Mustafa Ağa b. Abdurrahman b. Abdülmennan tarafından müseccel vekîl olmağla terekeye bi’l-vekâle vaz‘-ı yed ve vech-i âtî üzere husûmet ve redd-i cevâba kıbel-i şer‘den me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip müteveffât-ı mezbûre Fâtıma bt. Abdullah b. Abdullah fevtinden yirmi iki ay mukaddem bi-emrillâhi te‘âlâ fevtimden sonra mecmû‘-ı terekem ahz u kabz ve sünnet-i seniyye üzere techîz ve tekfîn ve sâir mesârif-i defnim görüldükden sonra bâkī terekemden yedlerinde olan hüccet-i şer‘iyye mûcebince altı aded köhne yastık ve üç köhne minder ve iki köhne döşek ve dört köhne yorgan ve bir köhne orta keçesi ve iki yan keçesi ve bir el tâbesi ve bir baklava tepsisi ve bir tuç evânî mu‘takalar Mülayim ve Gülbuy ve İbrahim evlâd-ı Abdullah’a verilip onlar dahi beynlerinde ale’s-seviye iktisâm edeler ve bâkī kalan terekemden bin akçe iskāt-ı salât oluna ve dört hatm-i şerîf tilâvet olunup sevâbı rûhuma ihdâ oluna ve herbir hatm-i şerîf mukābelesinde yüz ellişer sağ akçe verile ve fazla kalırsa vasiyy-i muhtârım re’yiyle eyyâm-ı mu‘tâdede tabh-ı ta‘âm ve it‘âm-ı hâs ve âm oluna deyü huzûr-ı Müslimînde beni vasiyy-i muhtâr nasb ü ta‘yîn ettikde ben dahi muvâcehesinde kabûl ve musırran-aleyhâ fevt olmağla hâlâ terekesini kabz ve vücûh-ı mezkûreye sarf murâd etdiğimde vekîl-i merkūm bi-gayr-ı hakkın vaz‘-ı yed ve bana teslîmden imtinâ‘ eder suâl olunsun dedikde gıbbe’s-suâl vekîl-i mezbûr cevâbında tereke-i müteveffât-ı mezbûreye vech-i muharrer üzere vaz‘-ı yedini ikrâr ve müdde‘î-i mezbûrun vech-i mübeyyen üzere müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûre imâmı Mehmed Efendi b. İsmail ve Müezzin Hasan Efendi b. Ali ve Mehmed Efendi b. Müstedam li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Fâtıma bt. Abdullah b. Abdullah fevtinden yirmi iki ay mukaddem bi-emrillâhi te‘âlâ fevtimden sonra mecmû‘-ı terekem ahz u kabz ve sünnet-i seniyye üzere techîz ve tekfîn ve sâir mesârif-i defnim görüldükden sonra bâkī terekemden yedlerinde olan hüccet-i şer‘iyye mûcebince altı aded köhne yastık ve üç köhne minder ve iki köhne döşek ve dört köhne yorgan ve bir köhne orta keçesi ve iki yan keçesi ve bir el tâbesi ve bir baklava tepsisi ve bir tuç havan mu‘takalarım Mülayim ve Gülbuy ve İbrahim evlâd-ı Abdullah’a verilip onlar dahi beynlerinde ale’s-seviye iktisâm edeler ve bâkī kalan terekemden bin akçe iskāt-ı salât oluna ve dört hatm-i şerîf tilâvet olunup sevâbı rûhuma ihdâ oluna herbir hatm-i şerîf mukābelesinde yüz ellişer sağ akçe verile ve fazla kalırsa vasiyy-i muhtârım re’yiyle eyyâm-ı mu‘tâdede tabh-ı ta‘âm ve it‘âm-ı hâs ve âm oluna deyü huzûrumuzda vasiyet ve tenfîzine işbu müdde‘î-i mezbûr Ali Beşe’yi vasiyy-i muhtâr nasb ü ta‘yîn ettikde ol dahi vesâyet-i mezbûreyi muvâcehesinde kabûl ve musırraten-aleyhâ vefât eyledi biz bu husûsa bu vech üzere şâhidleriz ve şehâdet dahi ederiz deyü herbiri edâ-i şehâdet-i şer‘iyye ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vasiyy-i mezbûrun terekeden kasr-ı yedini tenbîh eylediğini mevlânâ-yı mezbûr mahallinde ketb ü tahrîr ve ma‘an ba‘s olunan Mehmed b. Hüseyin ve Mustafa b. Mehmed ile meclis-i şer‘a gelip alâ-vukū‘ihi takrîr etmeğin mâ-vaka‘a kayd-şüd. Fî 25 Cumâdelâhir sene 1110 Şuhûdü’l-hâl: Mahmud Çelebi b. Hüseyin, Halil Beşe b. Osman, Ömer Efendi b. Hızır, Şa‘bân Dede b. Abdi, Ahmed Çelebi b. Mustafa.