Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 839 Hüküm no: 684 Orijinal metin no: [155b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vasiyetine vasi ve nazır tayini Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden irsâl olunan Mevlânâ es-Seyyid Abdülmuti Efendi umdetü’l-meşâyihi’l-kâmilîn zübdetü’l-vâ‘izine’n-nâsıhîn eş-Şeyh İsa Efendi b. Ali’nin mahmiye-i İstanbul’da Tercümân Yunus mahallesinde sâkin oldukları tekyelerine varıp zeyl-i kitâbda muharrerü’l-esâmî udûl-ı Müslimîn huzûrunda akd-i meclis-i şer‘-i nebevî eyledikde mûmâ-ileyhin üvey kızı olup zâtı mahalle-i mezbûre sükkânından fahrü’l-kuzât Hasan Efendi b. eş-Şeyh Osman Efendi ve Ömer Efendi b. Mustafa ta‘rîfleriyle mu‘arrefe olan Fâtıma Hatun bt. el-merhûm Mumcubaşı Mustafa Ağa meclis-i ma‘kūd-ı mezbûrda işbu bâ‘isü’l-kitâb İmâm Ali Efendi b. Şa‘bân mahzarında ikrâr ve takrîr-i kelâm edip hâlâ mübtelâ olduğum marazdan necât bulmayıp [156a] bi-emrillâhi te‘âlâ vefât edersem cemî‘ terekemden düyûn-ı sâbitem edâ olundukdan sonra bâkī kalan terekemin sülüsü ifrâz olunup bin bir akçesi iskāt-ı salât ve sâir ferâizim içün sarf oluna ve cenâzemi Üsküdar’a götürmek içün ve mezârım münderis olmamak içün vaz‘-ı ahcâr ve eyyâm-ı mu‘tâdede it‘âm-ı ta‘âm ve hâtemât-ı şerîfe ve tevhîd ü ezkâr-ı münîfe ve sâir vücûh-ı hayr u birre mecmû‘-ı sülüs nâzırlar re’yiyle harc ü sarf oluna deyü vasiyet edip tenfîzine mezbûr İmâm Ali Efendi’yi vasiyy-i muhtâr ve mûmâ-ileyh eş-Şeyh İsa Efendi’yi ve vâlidem Zahide Hatun bt. Hüseyin Efendi’yi hasbî nâzır nasb ü ta‘yîn eyledim dedikde onlar dahi vesâyet-i mezbûre ve nezâret-i merkūmeyi muvâcehesinde kabûl ve merâsimini edâya ta‘ahhüd etmeğin vâki‘ hâli mevlânâ-yı mezbûr mahallinde tahrîr ve ma‘an ba‘s olunan İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 27 min-Cumâdelâhire sene 1110 Şuhûdü’l-hâl: Zahrü’l-meşâyihi’l-kirâm eş-Şeyh Yahya Efendi b. eş-Şeyh Hüseyin el-Mennân(?), Umdet-i kuzât Mehmed Efendi b. Osman, Fahrü’l-kuzâti’l-müteşerri‘în Hasan Efendi b. Osman, Mehmed Dede b. Hüseyin, Mehmed Çelebi b. eş-Şeyh Ali Efendi, Ömer Efendi b. Mustafa.