Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 840 Hüküm no: 685 Orijinal metin no: [156a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Fatıma Hatun’un vasi Süleyman Beşe’nin alacak davasıyla ilgili sulh ve ibrası Mahmiye-i İstanbul’da Kırkçeşme kurbünde Sekbanbaşı Yakub Ağa mahallesinde sâkin iken bundan akdem vefât eden Mustafa Efendi b. Abdülcelil’in verâseti zevce-i menkûha-i metrûkesi Ümmühani Hatun bt. Abdurrahman ile sulbî oğlu Süleyman’a ve sagīre kızı Fâtıma’ya münhasıra olup kable’l-kısme mezbûr Süleyman dahi vefât edip verâseti li-ümmin er karındaşı Mustafa’ya ve li-ebin kız karındaşı mezbûre Fâtıma’ya münhasıra olup kable’l-kısme mezbûre Fâtıma dahi vefât edip verâseti zevc-i metrûku el-Hâc İbrahim b. el-Hâc Mehmed ile vâlidesi Saliha Hatun bt. Abdullah’a münhasıra ve tashîh meselesi bi-hükmi’l-münâsaha doksan altı sehmden olmağla sihâm-ı mezbûrenin on iki sehmi mezbûre Ümmühani’ye ve on dört sehmi mezbûr Mustafa’ya ve otuz beş sehmi mezbûr el-Hâc İbrahim’e ve otuz beş sehmi mezbûre Saliha’ya isâbeti tahakkukundan sonra mezbûre Fâtıma’nın hâl-i sıgārında tesviye-i umûruna bâ-hüccet-i şer‘iyye kıbel-i şer‘den mansûb vasîsi olan Süleyman Beşe b. Himmet meclis-i şer‘-i hatîr-ı lâzımü’t-tevkīrde hâfizü’l-kitâb mezbûr el-Hâc İbrahim mahzarında ikrâr ve takrîr-i kelâm edip mezbûre Fâtıma’nın hâl-i sıgārında nafaka ve kisvesine kendi malımdan bi-şartı’r-rücû‘ yirmi üç bin kırk akçe harc ü sarf edip mezbûre Fâtıma fevt oldukda terekesine vaz‘-ı yed eden mezbûr el-Hâc İbrahim’den deyn-i mezkûrdan hissesine isâbet eden on bir bin beş yüz yirmi akçeyi mezbûr el-Hâc İbrahim’den taleb ve da‘vâ eylediğimde ol dahi evvelâ vefât eden merkūm Mustafa Efendi’nin vilâyet-i Anadolu’da medîne-i Kütahya kazâsına tâbi‘ Gani(?) nâm karyede sâkin Çavuşzâde Abdurrahim Ağa zimmetinde cihet-i deyn-i şer‘îden işbu hükm hücceti mûcebince evvelâ on beş bin dokuz yüz altmış sağ akçeden tashîh-i mezbûr üzere kendi hisse-i merkūmesine isâbet eden beş bin sekiz yüz on akçeyi vesâyeten sen ahz u kabz eyledin deyü benden taleb ve da‘vâ eylediğinde beynimize muslihûn tavassut edip da‘vâ-yı merkū[mu]muzdan fâriğa olmak üzere herbirimiz husûs-ı merkūmeye müte‘allıka âmme-i de‘âvî ve mutâlebâtdan âharın zimmetini ibrâ-i âmm-ı katı‘ü’l-hisâm ile ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a kayd-şüd. Fî 28 min-Cumâdelâhire sene 1110 Şuhûdü’l-hâl: Ali Ağa b. İbrahim, Mehmed Ağa b. Receb, Ali Bey b. Mehmed, Arabacı Mustafa b. Şa‘bân, Ali Efendi el-Kâtib, Mustafa Çelebi b. ( ) el-Müezzin, Berber Mehmed Çelebi b. Mustafa, Ahmed Çelebi b. ( ) el-Muhzır.