Bab Mahkemesi 54 Numaralı Sicil (H. 1102 / M. 1691) cilt: 20, sayfa: 66 Hüküm no: 23 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hoca Hayreddin Mescidi Vakfı mütevellisi muhasebesinin kabulü Mahmiye-i İstanbul’da vâki‘ Hoca Hayreddin Mescid-i şerîfi Vakfı’na mütevellî olan el-Hâc Osman Efendi b. Ahmed nâm kimesne meclis-i şer‘-i şerîf-i enverde, bâ‘isü hâze’l-kitâb El-Hâc Mehmed b. Osman mahzarında bi’t-tevliye ikrâr ve takrîr-i kelâm edip, bundan akdem ben hacc-ı şerîfe gittiğimde tevliyeti bırakıp vakfın nâzırları olup zeyl-i kitâbda muharrerü’l-esâmi olan müslimîn huzûrunda yedimde mâl-ı vakf-ı mezbûr olan iki yüz guruş nakd-i mezbûru el-Hâc Mehmed’e teslîm, ol dahi nâzırlar ma‘rifetleriyle ahz u kabz edip, ba‘dehû ben hacca gittiğimde mezkûr el-Hâc Mehmed’e mâl-ı vakf-ı mezbûrdan yüz elli guruş işbu hâzır bi’l-meclis el-Hâc Ahmed b. Ömer’e yine nâzırlarımız ma‘rifetiyle idâne ve teslîm, mersûm el-Hâc Ahmed dahi istidâne ve kabz ve bi tarîki’l-istiğlâl yedimde olan hüccet nâtık olduğu üzre Servi Mahallesinde vâki‘ ma‘lûmü’l-hudûd mülk menzilini mezbûr el-Hâc Ömer’e rehin vaz‘ ve teslîm ettiklerinden sonra hâlâ ben geldiğimde vakf-ı mezbûrun nâzırları tevliyet-i mezkûreyi yine kabûl ile vermeleriyle, mezbûr el-Hâc Mehmed dahi ber vech-i muharrer makbûzu olan meblağ-ı mezbûr iki yüz guruşun elli guruşunu bana nakd[en] teslîm, ben dahi bi’t-tevliye kabz edip ve yüz elli guruşu dahi mezbûr el-Hâc Ahmed’den huzûr-ı müslimînde havâle ve ben dahi kabûl ve temessükâtını dahi kabz edip, hâlâ mâl-ı vakf-ı mezbûrdan mezbûr el-Hâc Mehmed yedinde bir akçe ve bir habbe kalmamışdır dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: El-Hâc Ömer b. Ali, Abdülkerim Odabaşı, el-Hâc Mehmed b. Ali, el-Hâc Mehmed b. Osman, el-Hâc Mehmed b. Veli.