Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 855 Hüküm no: 696 Orijinal metin no: [158b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin vefat eden Derviş’in vasisi olduğunu ispat ettiği Mahmiye-i İstanbul’da Hoca Gıyaseddin mahallesinde sâkin iken bundan akdem vefât eden el-Hâc Derviş b. İlyas b. Habib’in vech-i âtî üzere vasiyy-i muhtârı olduğunu iddi‘â eden hâfizü’l-kitâb Ali Çelebi b. İnayetullah mahfil-i kazâda müteveffâ-yı mezbûrun zâhirde zevce-i menkûha-i metrûkesi Saliha bt. Abdullah’dan gayrı vâris-i ma‘rûfu olmayıp terekesinin rub‘u zevcesi mezbûreye ve selâse-i erbâ‘ı cânib-i beytülmâle âid olmak üzere mahmiye-i mezbûrede bi’l-fi‘il yeniçeri beytülmâli [emîn] olup terekesinin selâse-i erbâ‘ına vaz‘-ı yed edip vech-i âtî üzere husûmet ve redd-i cevâba me’zûn olan el-Hâc Hüseyin Ağa b. Receb mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Derviş b. İlyas b. Habib hâl-i marazında fevtinden üç gün mukaddem bi-emrillâhi te‘âlâ kazâ-i nahb eylediğimde terekemden altmış guruş techîz ve tekfîn mesârifine sarf oluna ve terekemin sülüsünden üç yüz guruş ifrâz olunup mahalle-i mezbûrede vâki‘ bin yüz beş senesinde bi-emrillâhi te‘âlâ muhterik olan Hoca Gıyaseddin Mescid-i şerîfi ta‘mîr oluna ve bâkī kalan terekemin rub‘unu zevcem mezbûre Saliha ahz eyledikden sonra selâse-i erbâ‘ını vâlidem Şehriban nâm hatunun li-ebeveyn kız karındaşı ve zât-ı rahm cihetinden vârisem olan işbu Âişe Hatun bt. Hüseyin’e verile deyü vasiyet edip tenfîzine beni vasiyy-i muhtâr nasb ü ta‘yîn ben dahi muvâcehesinde ba‘de’l-kabûl musırran-aleyhâ fevt olmağla tenfîz-i vesâyâ murâd eylediğimde emîn-i mezbûr mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Sinan Ağa mahallesinde sâkin el-Hâc Mustafa b. Musa ve Yahnikapanı mahallesinde sâkin el-Hâc Mehmed b. Hüseyin ve Hızırbey mahallesinde sâkin Hasan Ağa b. Ali ve el-Hâc Ömer b. Ali nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka merhûm-ı mezbûr el-Hâc Derviş b. İlyas b. Habib hâl-i marazında fevtinden üç gün mukaddem huzûrumuzda bâlâda tafsîli mürûr eden vech üzere vasiyet edip tenfîzine müdde‘î-i mezbûr Ali Çelebi’yi vasiyy-i muhtâr nasb ü ta‘yîn eyledikde ol dahi muvâcehesinde ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 28 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.