Bab Mahkemesi 54 Numaralı Sicil (H. 1102 / M. 1691) cilt: 20, sayfa: 67 Hüküm no: 24 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Ahmed’in evini Mustafa Çelebi b. Şaban’a satması Mahrûse-i Galata hâricinde Sarı Lütfi mahallesinde sâkin Mehmed Efendi b. Ahmed meclis-i şer‘-i şerîf-i enver ve mahfil-i dîn-i münîf-i ezherde, işbu sâhibü’l-kitâb Mustafa Çelebi b. Şaban nâm kimesne mahzarında bi’t-tav‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp, akd-i âtî sudûruna değin silk-i mülk-i sahîhimde münselik olup, mahalle-i mezbûrede vâki‘ bir taraf İbrahim Yazıcı mülkü ve bir taraf İbrahim Dede mülkü ve bir taraf Derviş Abd[ullah] mülkü ve bir taraf tarîk-i hâs ile mahdûd olup, dört bâb fevkānî ve bir bâb tahtânî odalar ve bir ahır ve bir kenîf ve avlu ve mezbûr İbrahim Dede ile müşterek bi’r-i mâı müştemil mülk menzilimi, cemî‘ tevâbi‘ ve levâhıkı ve kâffe-i hukūk ve merâfık ile mezbûr Mustafa Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile nakd-i râyicü’l-vakt on iki bin akçeye bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr on iki bin akçeyi mezbûr Mustafa Çelebi yedinden bi’t-tamâm ve’l-kemâl ahz u kabz ve tesellüm eyledim. Ba‘de’l-yevm menzil-i mezbûr mezkûr Mustafa Çelebi’nin mülk-i müşterâsıdır, keyfe mâ mutasarrıf olsun dedikde, gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Münâdî Ömer Çelebi, el-Hâc Ahmed Efendi el-kâtib-i müfettiş efendi, Ebûbekir Çelebi b. el-Hâc Abdi, Haffâf Mehmed Çelebi b. Murad, Sâlih b. Mustafa, Hâcı Mehmed b. Mehmed, Sâlih b. Mustafa, Kayıkçı Veli el-muhzır, Ebûbekir b. Hüseyin, Mustafa Çelebi, Ahmed Ağa, Mehmed Efendi İmâmzâde, es-Seyyid Abdülmu‘tî Efendi.