Bab Mahkemesi 54 Numaralı Sicil (H. 1102 / M. 1691) cilt: 20, sayfa: 67 Hüküm no: 25 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mahmud Paşa’nın borçlarına karşılık evini ve çiftliğini rehin bırakması Husûs-ı âti’l-beyânı mahallinde ketb ve terkīm için cânib-i şer‘den bi’t-taleb irsâl olunan Mehmed Efendi b. Mustafa mahmiye-i İstanbul’da Çavuş ( ) Mescidi mahallesinde sâkin sâbıkan yeniçeri ağası olan izzetlü sa‘âdetlü Mahmud Paşa hazretlerinin sulbî oğlu umdetü’l-emâcid ve’l-a‘yân Mehmed Bey’in menziline varıp, zeyl-i kitâbda mektûbü’l-esâmi müslimîn huzûrlarında akd-i meclis-i şer‘-i nebevî eyledikde, mûmâ-ileyh Mehmed Bey meclis-i ma‘kūd-ı mezbûrda Felemenk tüccârından olup mahrûse-i Galata’da mütemekkin bâ‘isü’l-vesîka kendi tarafından asîl ve şerîki Petro v. Targadi tarafından husûs-ı âti’l-beyâna vekîl-i sâbitü’l-vekâlesi olan Zak v. Libos nâm müste’men muvâcehesinde bi tav‘-ı sâf ikrâr-ı sahîh-i şer‘î ve i‘tirâf-ı sarîh-i mer‘î kılıp, mezbûr Zak üç bin zirâ‘ ma‘hûr ta‘bîr olunur elvân-ı müte[ne]vvi‘a çukasını semeni târih-i kitâbdan yüz seksen bir gün tamâmına değin müeccel ve mev‘ûd her zirâ‘ı üçer buçuk guruş olmak üzre on bin beş yüz guruş edip, semen-i mezbûr dört bin iki yüz yaldız altını ecel-i mezkûr hulûlünde edâ ve teslîm etmek üzre zimmetinde lâzımü’l-edâ ve vâcibü’l-kazâ deynim olup, mukābelesinde silk-i mülkümde münselik olup, mahalle-i mezbûrede vâki‘ bir tarafı Fahri bt. Kasım Ağa mülkü ve bir tarafı Çorbacı İbrahim Ağa mülkü ve iki tarafı tarîk-i âm ile mahdûd muhavvatayı muhtevî olup, dâhiliyesi üç tabaka-yı ulyâda bir cüneyne oda ve bir kebîr oda ve bir sagīr oda ve yine mahalle-i mezbûrede iki kebîr oda ve ve kebîr sofa ve dehliz ve kenîf ve tabaka-yı vustâda bir hamam ve bir câmekân odası ve mutfak ve kiler ve beş bâb odası ve bir sofa ve bir kenîf ve süflâsında bir kiler odası ve üç tabaka bir mahzen ve bir mutfak ve bir kenîf ve bir su kuyusu ve bir su bacası ve eşcâr-ı müsmireli [4b] ve gayr-ı müsmireli bahçe ve muhavvata-i hâriciyesi dahi üç tabaka olup, tabaka-yı ulyâda bir mâbeyn odası ve bir kiler odası fevkinde bir hazîne odası ve üç oda ve bir kenîf ve dehliz ve bir kasr ve bir sofa ve tabaka-yı vustâda altı oda ve bir kenîf ve dehliz vustâda bir ahır ve bir anbar ve bir mutfak ve fıçı odası ve fevkānî bir mutfak ve altında bir kiler ve kenîf ve bahçe ve su kuyusunu müştemil, işbu akd-i meclis olunan mülk menzilimi içinde mevcûde esâs-ı ve evânî ve bi’l-cümle ism-i mâl ıtlâk olunur eşyâmı kendiye emânet vaz‘ ve ol vechile ba‘de’t-tahliye irhân ve teslîm, ol dahi irtihân ve kabûl edip ve yine yedimde mülk ve hakkım olup Havâss-ı Aliyye muzâfâtından Silivri nâhiyesinde Küçük Kılıçlı nâm karyede vâki‘ bana intimâ ile tahdîd ve tavsîfden müstağnî çiftliğimi içinde mevcûd olup, işbu hüccet-i şer‘iyyede ale’l-infirâd beyân olunan eşyâsı ile mahallinden rehin olmak üzre karz-ı mezbûru taslît eyledim dedikde, gıbbe’t-tasdîki’ş-şer‘î zikr olunan dört bin iki yüz altından yedi yüz altınına Paşa-yı [mûmâ]-ileyh kethüdâ[sı] Ahmed Ağa b. Abdullah ve sekiz yüz altınına mühürdârı Şahin Ağa b. Abdullah ve dört yüz altınına dîvân efendisi Ebûbekir b. ( ) ve yüz yetmiş altınına el-Hâc Murad b. Ali ve yüz yetmiş altınına vekîl-i harc Mehmed Ağa b. Hızır ve yüz yetmiş altınına Hazînedâr Ahmed Çelebi b. Hasan emr [ve] kabûlü hâviye kefâlet-i sahîha-i şer‘iyye ile kefîl olduklarından sonra mezbûr Mehmed Bey meclis-i mezbûrda Mustafa Ağa b. Abdullah mahzarında i‘âde-i kelâm edip, müddet-i merkūme yüz seksen bir gün tamâmında edâ-i deyn ile fekk-i rehin etmezsem mârru’l-beyân menzil ve zikri mürûr eden çiftlik ve içinde mevcûd esâs-ı beyt ve evânî-i nühâsiye ve gayr-ı nühâsiye ve devvâb ve mevâşî ve âlet-i zirâ‘at ve hırâseti tâlibine semen-i misilleriyle bey‘ ve çiftlik-i mezbûr ile taht-ı tasarrufunda olup, ma‘lûmü’l-hudûd ve’l-kat‘ tarlalarımı dahi izn-i sâhib-i arz ile âhara ferâğ ve tefvîz ve semen ve bedellerini kabza ve deyn-i mezbûru edâya ve husûs-ı mezbûre mütevakkıf oldukları umûrun küllîsine azl in‘izâlden masûne vekâleti devriye ile mezbûr Mustafa Ağa’yı tarafımdan vekîl eyledim dedikde, ol dahi vekâlet-i mezbûreyi kabûl ve hizmet-i lâzımesin edâya ta‘ahhüd etmeğin, vâki‘ hâli mezbûr Ömer Efendi mahallinde ketb ve tahrîr edip, ba‘dehû cânib-i şer‘den ma‘an irsâl olunan İbrahim Çelebi b. Ömer ve Mehmed b. Mahmud ile meclis-i şer‘a gelip alâ vukū‘ihî inhâ ve takrîr etmekle, işbu vesîka gıbbe’l-ibtigā ketb olundu. Fi’l-yevmi’s-sâlis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mustafa Çelebi b. el-Hâc Musa, Ahmed Ağa b. İbrahim beytülmâl, Ömer Efendi b. Hâcı, el-Hâc Yusuf b. Süleyman, Şaban Ağa b. Hüseyin, el-Hâc İvaz b. Abdullah ve gayruhüm mine’l-hâzırîn.