Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 869 Hüküm no: 706 Orijinal metin no: [161a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anter Hatun’un vasiyeti Husûs-ı âti’l-beyânın mahallinde ketb ü tahrîri içün kıbel-i şer‘den me’zûnen bi’l-iltimâs irsâl olunan Yahya Efendi mahmiye-i İstanbul’da el-Hâc Hasan mahallesinde vâki‘ el-Hâc Ahmed’in menziline varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘ ettikde menzil-i mezbûrda âriyeten sâkine olup zâtı el-Hâc Mehmed b. Hüseyin ve Mehmed Çelebi b. el-Hâc Fethi ta‘rîfleriyle mu‘arrefe olan Anter Hatun bt. Abdullah meclis-i ma‘kūd-ı mezbûrda râfi‘ü’l-kitâb Ali Çelebi b. el-Hâc Fethi mahzarında ikrâr ve takrîr-i kelâm edip menzil-i mezbûrda nakd elli guruş ve bir çift altın bilezik ve bir sîm ön kuşak ve altı yastık ve dört minder ve bir orta keçesi ve iki yan keçesi ve iki tencere ve dört sahan ve bir bakraç ve bir tepsi ve bir tas ve altı yorgan ve beş kaftan ve iki kapama ve iki top kenarlı bezden mâ‘adâ ismi mal ıtlâk olunur şeyim olmayıp bi-emrillâhi te‘âlâ vefât eylediğimde zikr olunan elli guruş ile bir çift altın bilezik ve bir sîm kuşak semeninden vech-i mesnûn üzere levâzım-ı techîz ve tekfînim görüldükden sonra on beş guruş iskāt-ı salâtıma ve bir altın telkīnim eden kimesneye verilip mâ‘adâsı ile tabh-ı ta‘âm ve it‘âm-ı fukarâ oluna ve eşyâ-i bâkiye-i mezkûrem vârisem olmamağla işbu mezbûr el-Hâc Ahmed ile zevcesi Emine Hatun’a verilsin deyü vasiyet edip tenfîzine mezbûr Ali b. el-Hâc Fethi’yi vasiyy-i muhtâr nasb [u] ta‘yîn ol dahi vech-i muharrer üzere vesâyet-i mezbûr[u] muvâcehesinde kabûl eylediğini mevlânâ-yı mezbûr ketb [ü] tahrîr ba‘dehû ma‘an irsâl olunan İbrahim b. Mehmed ile meclis-i şer‘a gelip alâ-vukū‘ihi mâ-vaka‘a kayd-şüd. Fî 29 min-Cumâdelâhire sene 1110 Şuhûdü’l-hâl: el-Hâc Receb b. ( ), Abdullah Efendi b. Müstakim, Yusuf b. İbrahim, Dilaver b. Abdullah.