Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 877 Hüküm no: 714 Orijinal metin no: [162b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ayşe Hatun’un annesi Sabiha’nın miras hakkını aldığı Husûs-ı âti’l-beyânın mahallinde ketb ü tahrîri içün savb-ı şer‘-i enverden bi’t-taleb irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Dâye Hatun mahallesinde Pir[i] Mehmed Ağa b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde menzil-i mezbûrda sâkine iken bundan akdem vefât eden Âişe Hatun bt. Mehmed’in verâseti zevc-i metrûku mezbûr Pîrî Mehmed Ağa ile vâlidesi Sabiha Hatun bt. Hasan’a ve kebîr oğulları Mehmed Efendi ve İbrahim Çelebi ve sagīr oğlu Osman ve sagīre kızı Hadîce’ye münhasıra ve tashîh meselesi on iki sehmden olmağla sihâm-ı mezbûrenin üç sehmi zevci mezbûr Pir[i] Mehmed Ağa’ya ve iki sehmi vâlidesi mezbûre Sabiha Hatun’a ve ikişer sehmi oğulları mezbûrûndan herbirine ve bir sehmi kızı sagīre-i mezbûreye isâbeti tahakkukundan sonra zâtı el-Hâc Ali b. Hüseyin ve İsmail Bey b. Mehmed ta‘rîfleriyle mu‘arrefe olan mezbûre Sabiha Hatun meclis-i ma‘kūd-ı mezbûrda tereke-i müteveffâ-yı mezbûra bi’l-verâse vâzı‘u’l-yed olan hâfizü’l-kitâb merkūm Pir[i] Mehmed Ağa mahzarında ikrâr ve takrîr-i kelâm edip kızım müteveffât-ı mezbûrenin terekesinden ber-mûceb-i defter-i kassâm-ı askerî tashîh-i mezbûr üzere hisseme isâbet eden yüz doksan dört guruş ile zevci mezbûr Pir[i] Mehmed Ağa zimmetinde mütekarrir ve ma‘kūdun-aleyh olan otuz bin sağ akçe mehr-i müeccelinden kezâlik tashîh-i mezbûr üzere hisseme isâbet eden beş bin sağ akçeyi terekeden olmak üzere mezbûr Pir[i] Mehmed Ağa yedinden bi’t-tamâm alıp kabz ettikden sonra müteveffât-ı mezbûrenin zimmetinde cihet-i deyn-i şer‘îden yüz guruş hakkım vardır deyü da‘vâ ol dahi inkâr edip ol dahi inkâr etmekle beynimizde münâza‘ât-ı kesîre vukū‘undan sonra muslihûn tavassut edip mezbûr Pir[i] Mehmed Ağa kendi malından bana bin akçe verip ben dahi meblağ-ı mezbûr bin akçeyi yedinden alıp kabz edip zikr olunan yüz guruş da‘vâsından ve sâir müteveffât-ı mezbûrenin cemî‘ terekesinden tashîh-i mezbûr üzere hisseme isâbet eden âmme-i mîrâs da‘vâsından mezbûr Pir[i] Mehmed Ağa ile müteveffât-ı mezbûrenin sâir veresesinin zimmetlerini ibrâ-i âmm-ı katı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Nezir ve Mehmed b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 26 min-Cumâdelâhire sene 1110 Şuhûdü’l-hâl: Umdetü’l-müderrisîni’l-kirâm Murad Efendi, el-Hâc İbrahim Ağa b. Mehmed Keresteci, Mehmed Efendi b. Süleyman el-İmâm, Mehmed Bey b. İbrahim, Ahmed b. İbrahim.