Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 878 Hüküm no: 715 Orijinal metin no: [162b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Ahmed Beşe’nin terekesini zapteden Beytülmâl Emini Hüseyin Ağa’nın vefat eden Macuncu Mustafa’da Ahmed Beşe’nin alacağı olduğu iddiasıyla açtığı davayı ispat edemediği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den Mevlânâ Altıparmakzâde İsmail Efendi irsâl olunup ol dahi mahmiye-i İstanbul’da Süleymaniye Câmi‘-i şerîfi kurbünde Dergâh-ı âlî yeniçerileri beytülmâl emîni olanlara mahsûs odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde tâife-i mezbûrenin yirmi beş bölük oda yoldaşlarından olup bu sene-i mübârekede sefer-i hümâyûnda şehîden vefât eden Ahmed Beşe b. Mehmed’in zâhirde vâris-i ma‘rûfu olmamağla mecmû‘-ı terekesi cânib-i beytülmâle âid oldukdan sonra mahmiye-i mezbûrede bi’l-fi‘il yeniçeri beytülmâli emîni ve kıbel-i şer‘den husûmet ve redd-i cevâba me’zûn olan Hüseyin Ağa b. Receb meclis-i ma‘kūd-ı mezbûrda mahmiye-i mezbûrede Küçükpazar kurbünde Molla Ahaveyn mahallesinde sâkin iken bundan akdem vefât eden Ma‘cunî el-Hâc Mustafa b. Abdullah b. Abdurrahman’ın kebîre kızı ve hasren vârisesi olup zâtı ta‘rîf-i şer‘î ile mu‘arrefe olan bâ‘isetü’l-kitâb Âişe Hatun mahzarında bi’l-emâne üzerine da‘vâ ve takrîr-i kelâm edip [163a] mezbûr Ahmed Beşe sefer-i hümâyûna gitmezden mukaddem mezbûre Âişe Hatun’un babası mezbûr Ma‘cunî el-Hâc Mustafa b. Abdullah b. Abdurrahman’a kendi malından iki yüz guruş emâne[t] vaz‘ ve teslîm edip kable’l-ahz mezbûr Ahmed Beşe fevt olmağla mezbûre Âişe Hatun’dan taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz ile istihlâf etmeğin müteveffâ-yı mezbûr Ahmed Beşe b. Abdullah b. Abdullah mezbûre Âişe babası müteveffâ-yı mezbûr Ma‘cunî el-Hâc Mustafa b. Abdullah’a kendi malından iki yüz guruş emânet vaz‘ ve teslîm etdiğini bilmeyip ve üzerine redd ü damân lâzım gelmediğine mezbûre Âişe Hatun’a yemîn teklîf olundukda ol dahi ber-vefki’l-mesûl yemîn billâhi’l-aliyyi’l-a‘lâ etmeğin emîn-i mezbûr husûs-ı mezbûra müte‘allıka mezbûre Âişe ile husûs-ı mezbûra müte‘allık bilâ-beyyine mu‘ârazadan men‘ eylediğini mevlânâ-yı mezbûr mahallinde tahrîr ba‘dehû ma‘an mürsel Ahmed Çelebi b. Ali ve Mehmed b. Mustafa ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî gurreti Recebi’l-mürecceb sene 1110 Şuhûdü’l-hâl: Ahmed Ağa b. Nasuh, Mehmed Efendi b. Mustafa el-İmâm, Ramazan Beşe b. Ebubekir, Kadri Efendi b. ( ).