Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 879 Hüküm no: 716 Orijinal metin no: [163a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin Salih Efendi’nin vefat eden Mahmud Beşe’nin vasisi olduğunu ispat ettiği Husûs-ı âti’l-beyânın mahallinde istimâ‘ [ve] tahrîri iltimâs olunmağın kıbel-i şer‘den me’zûnen Mevlânâ Nuh Efendi b. Musa irsâl olunup ol dahi mahmiye-i İstanbul’da Mustafa Bey mahallesinde sâkin İmâm Ahmed Efendi’nin menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde mahalle-i mezbûrede sâkin iken bundan akdem vefât eden Mahmud Beşe b. Ahmed b. Abdürrezzak’ın vech-i âtî üzere vesâyâsını tenfîze vasiyy-i muhtârı olduğunu iddi‘â eden mahalle-i mezbûrede sâkin bâ‘isü’l-kitâb Müezzin Salih Efendi b. Mustafa meclis-i ma‘kūd-ı mezbûrda müteveffâ-yı mezbûrun zâhirde vâris-i ma‘rûfu olmamağla mahmiye-i mezbûrede bi’l-fi‘il beytülmâli’l-hâs emîni Mustafa Ağa b. Abdurrahman b. Abdülmennan tarafından müseccel vekîli ve kıbel-i şer‘den husûmet ve redd-i cevâba me’zûn olmağla terekesine vaz‘-ı yed eden Mehmed Bey b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Mahmud Beşe b. Ahmed b. Abdürrezzak fevtinden on beş gün mukaddem bi-emrillâhi te‘âlâ fevt olduğumda terekemden on beş guruş ifrâz olunup meblağ-ı mezbûr ile vech-i mesnûn üzere levâzım-ı techîz ve tekfînim görüle ve otuz buçuk guruş dahi hakkım (vakfım) olup sen kabz edip vech-i şer‘î üzere i‘mâl ve gallesinden Mustafa Bey Mescid-i şerîfinde mumlar alınıp îkād oluna ve fazlası Vilâyet-i Anadolu’da Küre-i Nühâs kazâsına tâbi‘ Arslanlı nâm karyede vâlidem Fâtıma Hatun’a îsâl oluna deyü vasiyet edip tenfîzine beni huzûr-ı Müslimînde vasiyy-i muhtâr nasb ü ta‘yîn ettikde ben dahi muvâcehesinde kabûl ve musırran alâ-îsâihî fevt oldukda tenfîz-i vesâyâ murâd etdiğimde <> vekîl-i mezbûr Mehmed Bey terekesine bi-gayr-ı hakkın vaz‘-ı yed ve bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i merkūm Salih Efendi’den sıdk-ı makāline beyyine taleb olundukda udûl-ı Müslimînden mahalle-i mezbûrede sâkin el-Hâc Mahmud Ağa b. Mehmed ve Ali Ağa b. İbrahim li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Mahmud Beşe b. Ahmed b. Abdürrezzak fevtinden on beş gün mukaddem bi-emrillâhi te‘âlâ fevt olduğumda terekemden on beş guruş ifrâz olunup meblağ-ı mezbûr ile vech-i mesnûn üzere levâzım-ı techîz ve tekfînim görüle ve otuz buçuk guruş dahi vakfım olup müdde‘î-i merkūm Salih Efendi kabz ve vech-i şer‘î üzere i‘mâl ve hâsıl olan gallesinden mescid-i şerîf-i mezbûra mumlar alınıp îkād oluna ve fazlası karye-i mezbûrede sâkine vâlidem Fâtıma Hatun’a îsâl oluna deyü huzûrumuzda vasiyet edip tenfîzine merkūm Salih Efendi’yi vasiyy-i muhtâr nasb ü ta‘yîn ettikde ol dahi muvâcehesinde kabûl ve musırran alâ-îsâihî vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hüseyin Çelebi b. Mehmed ve Mustafa b. Abdi ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 5 min-Recebi’l-ferd sene 1110 Şuhûdü’l-hâl: Ahmed Efendi b. Mehmed, Mehmed Çelebi b. Hasan, Mustafa Beşe b. Ali, Ali Beşe b. Hüseyin, İsmail Bey b. Müstakim, Ahmed Beşe b. Abdullah.