Bab Mahkemesi 54 Numaralı Sicil (H. 1102 / M. 1691) cilt: 20, sayfa: 69 Hüküm no: 26 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keştî Ahmed Ağa b. Ramazan’ın varislerinin vasîlerine Sâlih b. İbrahim ve Hüseyin b. Mustafa’nın nâzır tayin edilmesi Mahmiye-i İstanbul’da Kiçi Hâtun mahallesinde sâkine iken bundan akdem Budin muhârebesinde esîr olduğu hâlde fevt olan Keştî Ahmed Ağa b. Ramazan b. Abdullah nâm kimesnenin evlâd-ı sıgār-ı Mustafa ve Hatice ve Fâtıma’nın kıbel-i şer‘den mansûb vasîleri olan Muharrem Odabaşı üzerine nâzır nasb ve ta‘yîn olmak lâzım ve mühim olmağla, işbu râfi‘ü’l-vesîka Sâlih Efendi b. İbrahim ve Hüseyin Çelebi b. Mustafa nâm kimesneler her vechile nezâret der-uhdesinden gelmeğe kemâ-yenbağī kādir oldukları zeyl-i kitâbda muharrerü’l-esâmi olan sikāt-ı müslimîn ihbârıyla lede’ş-şer‘i’l-enver zâhir ve mütekarrir olmağla, mezbûrân Sâlih Efendi ve Hüseyin Çelebi kıbel-i şer‘den nâzır nasb ve ta‘yîn olunduklarında dahi nezâret-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm etmeleriyle, işbu vesîka-i enîka mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Şaban Ağa b. Mehmed, Mehmed Ağa b. Emri, Mustafa b. Hüseyin, Mustafa Çelebi b. Hasan, Mehmed Çelebi b. Mustafa, Sâlih Çelebi b. ( ), Mustafa b. Ali, Mustafa b. Abdülbâki.