Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 880 Hüküm no: 717 Orijinal metin no: [163a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mustafa Efendi’nin vefat eden Mehmed Efendi’nin kendisini vasi tayin ettiğini ispat ettiği Mahmiye-i İstanbul’da Emin Sinan mahallesi ahâlîsinden olup bundan akdem vefât eden merhûm Mehmed Efendi b. el-merhûm Süleyman Efendi b. İbrahim’in verâseti zevce-i menkûha-i metrûkesi Fâtıma bt. Yakub Efendi ile li-ebeveyn ammi Abdullah Ağa’ya münhasıra oldukdan sonra müteveffâ-yı mezbûrun vech-i âtî üzere vesâyâsını tenfîze vasiyy-i muhtârı olduğunu iddi‘â eden hâfizü’l-kitâb fahrü’l-müderrisîni’l-kirâm Mustafa Efendi b. el-Hâc Halil meclis-i şer‘-i hatîr-ı lâzımü’t-tevkīrde tereke-i müteveffâ-yı mezbûra bi’l-verâse vaz‘-ı yed edip zâtı Abdi Çelebi b. Ali ve Mustafa Ağa b. Hüseyin ta‘rîfleriyle mu‘arrefe olan mezbûre Fâtıma ile merkūm Abdullah Ağa mahzarlarında üzerlerine da‘vâ ve takrîr-i kelâm edip müteveffâ-yı mezbûr Mehmed Efendi b. el-merhûm Süleyman Efendi b. İbrahim hâl-i marazında fevtinden üç gün mukaddem bi-emrillâhi te‘âlâ kazâ-i nahb eylediğimde vech-i mesnûn üzere levâzım-ı techîz ve tekfînim görüldükden sonra bâkī kalan meblağ-ı terekemin sülüsünü sen ahz u kabz edip yüz guruşu ile eyyâm-ı mu‘tâdede tabh-ı ta‘âm ve it‘âm-ı fukarâ ve sulehâ oluna ve elli guruşunu iskāt-ı salâtım içün devir olunup fukarâya tasadduk oluna ve iki yüz elli guruşu el-Hâc İbrahim nâm kimesneye verilip benim içün hacc-ı şerîf etdirile ve iki yüz elli guruşu dahi eş-Şeyh Mehmed Efendi nâm kimesneye verilip pederim merhûm Süleyman Efendi içün hacc-ı şerîf etdirile ve malik olduğum beş Mushaf-ı şerîf sülüs-i mezbûrdan vakıf olup müstahakkına verile ve on beş Mushaf-ı şerîf dahi iştirâ olunup senin dersinde hâzır olan talebe-i ilme verile ve ehl-i Kur’ân’dan on beş nefer âdeme birer yaldız altını verilip mukābelesinde herbiri birer hatm-i şerîf tilâvet edip [163b] sevâbını keremlerinden rûhuma ihdâ eyleyeler ve mahalle imâmı Ali Efendi’ye on guruş ve Müezzin Ömer’e beş guruş ve Molla İbrahim’e beş guruş ve Molla Ali’ye on guruş ve Kayyum Molla Mehmed’e yedi buçuk guruş ve es-Seyyid Mustafa’ya otuz guruş ve diğer Molla İbrahim’e otuz guruş ve Şehrî Hatun’a otuz guruş ve Üsküdarî İsmail’e on guruş ve Bekçi Ali zevcesine iki buçuk guruş ve iğneciye beş guruş ve İznikmidli es-Seyyid Mustafa Çelebi’ye on guruş ve Süleymaniye’de sâkin Hâfız Ahmed Efendi’ye on beş guruş ve Ali Efendi’ye yirmi guruş verile ve malik olduğum cemî‘ kitâblarım sülüs-i mezbûrdan vakıf olup hayâtda oldukça sen zabt u hıfz eyle ve sülüs-i mezbûrdan fazla kalırsa senin re’yinle vakıf olup hâsıl olan gallesini hayâtda oldukça sen alıp mukābelesinde haftada iki gün Ali Paşa Câmi‘-i şerîfinde talebe-i ilme ta‘lîm-i ulûm-ı nâfi‘a eyle deyü huzûr-ı Müslimînde vasiyet edip tenfîzine beni vasiyy-i muhtâr nasb ettikde ben dahi muvâcehesinde ba‘de’l-kabûl musırran-aleyhâ vefât etmekle cemî‘ terekesinin sülüsünü taleb eylediğimde mezbûrân Abdullah Ağa ve Fâtıma bana teslîmden imtinâ‘ ederler suâl olunsun dedikde gıbbe’s-suâl mezbûrân Abdullah Ağa ve Fâtıma cevâblarında tereke-i müteveffâ-yı mezbûra bi’l-verâse vaz‘-ı yedlerini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûrede sâkin es-Seyyid Ahmed Çelebi b. Mustafa ve Ali Paşa Medresesi’nde sâkin Osman Efendi b. Murad ve Süleymaniye Medresesi’nde sâkin es-Seyyid Mustafa Efendi b. Resul ve mahmiye-i mezbûrede Davud Paşa mahallesinde sâkin diğer Osman Efendi b. Abdurrahman ve Hüseyin Beşe b. Mahmud li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffâ-yı mezbûr Mehmed Efendi b. el-merhûm Süleyman Efendi b. İbrahim hâl-i marazında fevtinden üç gün mukaddem bi-emrillâhi te‘âlâ kazâ-i nahb eylediğimde vech-i mesnûn üzere levâzım-ı techîz ve tekfînim görüldükden sonra bâkī kalan cemî‘ terekemin sülüsünü müdde‘î-i mezbûr Mustafa Efendi’ye sen ahz u kabz edip yüz guruş ile eyyâm-ı mu‘tâdede tabh-ı ta‘âm ve it‘âm-ı fukarâ oluna ve elli guruşu iskāt-ı salâtım içün devir olunup fukarâya tasadduk oluna ve iki yüz elli guruşu el-Hâc İbrahim nâm kimesneye verilip benim içün hac etdirile ve iki yüz elli guruşu eş-Şeyh Mehmed Efendi’ye verilip pederim merhûm Süleyman Efendi içün hac etdirile ve malik olduğum beş Mushaf-ı şerîf sülüs-i mezbûrdan vakıf olup müstahakkına verile ve on beş Mushaf dahi iştirâ olunup mezbûr Mustafa Efendi’nin dersinde hâzır olan talebe-i ilme verile ve ehl-i Kur’ân’dan on beş nefer âdeme birer yaldız altını verilip mukābelesinde herbiri birer hatm-i şerîf tilâvet edip sevâbını keremlerinden rûhuma ihdâ edeler ve mahalle imâmı Ali Efendi’ye on beş guruş ve Müezzin Ömer’e beş guruş ve Molla İbrahim’e beş guruş ve Molla Ali’ye on guruş ve Kayyum Mehmed’e yedi buçuk guruş ve es-Seyyid Mustafa’ya otuz guruş ve diğer Molla İbrahim’e otuz guruş ve Şehrî Hatun’a otuz guruş ve Üsküdarlı İsmail’e on guruş ve Bekçi Ali zevcesine iki buçuk guruş ve iğneciye beş guruş ve İznikmidli es-Seyyid Mustafa’ya on guruş ve Hâfız Ahmed Efendi’ye on beş guruş ve Ali Efendi’[ye] yirmi guruş verile ve malik olduğum cemî‘ kitâblarım sülüs-i mezbûrdan vakıf olup hayâtda oldukça sen zabt u hıfz eyle ve sülüs-i mezbûrdan fazla kalırsa mezbûr Mustafa Efendi’ye senin re’yinle vakıf olup hâsıl olan gallesini hayâtda oldukça sen alıp mukābelesinde haftada iki gün Ali Paşa Câmi‘-i şerîfinde talebe-i ilme ta‘lîm-i [ulûm-ı] nâfi‘a eyle deyü huzûrumuzda vasiyet edip tenfîzine müdde‘î-i mezbûr Mustafa Efendi’yi vasiyy-i muhtâr nasb ettikde ol dahi muvâcehesinde ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 12 min-Cumâdelâhire sene 1110 Şuhûdü’l-hâl: Fahrü’l-a‘yân Mustafa Ağa b. Abdurrahman, İbrahim Efendi b. Ahmed Küçük İmâm-ı Ayasofya, Mustafa Mehmed Çelebi b. el-Hâc Mehmed b. Yakub tâbi‘-i tarîkden, Mustafa Ağa b. Hüseyin akrabâ-yı merhûm, Abdi Çelebi b. Ali, İbrahim Çelebi b. Mehmed.