Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 883 Hüküm no: 719 Orijinal metin no: [164a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi vefat eden Kutucu Mehmed Ağa’nın vesayetini ve kızının vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den me’zûnen irsâl olunan Mevlânâ Nikâtî Ali Efendi b. Osman mahmiye-i İstanbul’da Mahmud Paşa mahallesinde sâkin iken bundan akdem vefât eden Kutucu el-Hâc Mehmed Ağa b. el-Hâc Ali b. Sadık’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkesi Safiye Hatun bt. Abdullah ile sulbî kebîr oğlu Ali Çelebi ve kebîre kızı Saliha Hatun ve sagīre kızı Fâtıma’ya münhasıra olduğu şer‘an zâhir ve müte‘ayyin oldukdan sonra mezbûr Ali Çelebi meclis-i ma‘kūd-ı mezbûrda tereke-i müteveffâ-yı mezbûra vâzı‘atü’l-yed olup zâtı mahmiye-i mezbûrede Kâtib Sinan mahallesinde sâkin Ahmed Çelebi b. Ali ve Avratpazarı’nda Aşçı Ali Ağa odalarının birinde sâkin Halil Çelebi b. Yusuf ta‘rîfleriyle mu‘arrefe olan mezbûre Safiye Hatun mahzarında üzerine da‘vâ ve takrîr-i kelâm edip babam müteveffâ-yı mezbûr Kutucu(?) el-Hâc Mehmed Ağa b. el-Hâc Ali b. Sadık hâl-i hayâtında ve kemâl-i akl-ı sıhhatinde fevtinden iki ay mukaddem bi-emrillâhi te‘âlâ fevtimden sonra terekemin sülüsünden ancak yüz guruş ifrâz olunup meblağ-ı mezbûr ile iskāt-ı salât ve eyyâm-ı mu‘tâdede tabh-ı ta‘âm ve it‘âm-ı sulehâ ve fukarâ oluna deyü vasiyet edip tenfîzine ve sagīre kızı mezbûre Fâtıma’nın tesviye-i umûruna beni vasiyy-i muhtâr nasb ü ta‘yîn edip ben dahi muvâcehesinde ba‘de’l-kabûl musırran-aleyhâ vefât etmekle tenfîz-i vesâyâ murâd eylediğimde mezbûre Safiye Hatun mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda mu‘arrifân-ı mezbûrân Halil ve Ahmed Çelebi b. Ali li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Kutucu el-Hâc Mehmed Ağa b. el-Hâc Ali b. Sadık hâl-i kemâl-i sıhhatinde fevtinden iki ay mukaddem bi-emrillâhi te‘âlâ fevtimden sonra terekemin sülüsünden ancak yüz guruş ifrâz olunup meblağ-ı mezbûr ile iskāt-ı salât ve eyyâm-ı mu‘tâdede tabh-ı ta‘âm ve it‘âm-ı fukarâ ve sulehâ oluna deyü vasiyet edip tenfîzine ve sagīre kızı mezbûre Fâtıma’nın tesviye-i umûruna müdde‘î-i mezbûru huzûrumuzda vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Çukadâr el-Hâc Süleyman b. Abdullah ve Hüseyin Çelebi b. Mehmed ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî selhi min-Cumâdelâhire sene 1110 Şuhûdü’l-hâl: es-Seyyid Mustafa Efendi b. es-Seyyid Cafer el-Kādı bi-kazâi Previşte?. muvakkaten, Halil Efendi b. Mehmed, el-Hâc İsmail b. İbrahim, İmâm-ı sânî Ahmed Efendi, Ahmed b. Abdullah, Ali Çelebi b. el-Hâc Ömer ve gayruhum mine’l-huzzâr.