Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 884 Hüküm no: 720 Orijinal metin no: [164b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Turşucu Mehmed Beşe’nin küçük çocuklarına vasi tayini Mahmiye-i İstanbul’da Küçükpazar kurbünde Hoca Hayreddin mahallesinde sâkin iken bundan akdem vefât eden Turşucu Mehmed Beşe b. Ali b. Ahmed’in sagīre kızları Emine ve Fâtıma ve sagīr oğlu Ali’nin tesviye-i emrlerine kıbel-i şer‘-i enverden bir vasî nasbı lâzım ve mühim olmağın emânet ve diyânet ile ma‘rûf olup mahmûdü’l-hâl olduğu zeyl-i kitâbda muharrerü’l-esâmî Müslimîn haberleriyle lede’ş-şer‘i’ş-şerîf zâhir olan mahalle-i mezbûrede sâkin müteveffânın karındaşı işbu hâfizü’l-kitâb Turşucu Mustafa Çelebi b. Ali’yi hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri tesviye-i umûr-ı sıgār-ı mezbûrîne vakt-i rüşd ü sedâdlarına varınca vasî nasb ü ta‘yîn buyurduklarında ol dahi vesâyet-i mezkûreyi kabûl ve hizmet-i lâzımesini kemâ yenbağī edâya ta‘ahhüd ve iltizâm etmeğin mâ-vaka‘a kayd-şüd. Fî 30 min-Cumâdelâhire sene 1110 Şuhûdü’l-hâl: İmâm Hasan Efendi b. Ahmed mahalle-i Kasab Timurhan, Halil Efendi b. Hüseyin el-Müezzin, el-Hâc Ali b. Mehmed Sultan Bayezidli, Hasan Beşe b. Halil, Yusuf Çelebi b. Abdullah, Abdullah Efendi, Ahmed b. Muslu.