Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 884 Hüküm no: 721 Orijinal metin no: [164b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Ayşe’nin hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şer‘-i şerîfden me’zûnen irsâl olunan Mevlânâ Mehmed Efendi b. Mahmud mahmiye-i İstanbul’da Mollagürânî mahallesinde vâki‘ sâbıkā Mısr-ı Kāhire kādısı umdetü’l-mevâli’l-izâm Abdülhalim Efendi’nin menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i âlî ettikde mahalle-i mezbûrede sâkine olup zikri âtî müteveffâta rıkk-ı sâbıkını mu‘terife olan işbu orta boylu açık kaşlı gök elâ gözlü Rusiyyetü’l-asl hâfizetü’l-kitâb Âişe bt. Abdullah meclis-i ma‘kūd-ı mezkûrda mahalle-i mezbûre ahâlîsinden olup Mısr-ı Kāhire’den gelir iken esnâ-i tarîkde bundan akdem vefât eden Fâtıma Hatun bt. Abdullah b. Abdullah’ın zâhirde vâris-i ma‘rûfu olmamağla mecmû‘-ı terekesi cânib-i beytülmâle âid olmağın mahmiye-i mezbûrede bi’l-fi‘il Beytülmâli’l-hâs emîni mefharü’l-a‘yân Mustafa Ağa b. Abdurrahman b. Abdülmennan tarafından müseccel vekîl olmağla terekesine bi’l-vekâle vaz‘-ı yed ve vech-i âtî üzere husûmet ve redd-i cevâba kıbel-i şer‘den me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip seyyidem müteveffât-ı mezbûre Fâtıma Hatun bt. Abdullah b. Abdullah hâl-i kemâl-i sıhhatinde mülkünde olduğum hâlde beni huzûr-ı Müslimînde malından tahrîr ve i‘tâk ve silk-i harâir-i asliyâta idrâc ve ilhâk etmekle ben sâir harâir-i asliyât gibi hürre olmuş iken rıkk olup terekeden olmak üzere vekîl-i mezbûr bana bi-gayr-ı hakkın vaz‘-ı yed eder suâl olunsun dedikde gıbbe’s-suâl vekîl-i mezbûr cevâbında mevsûfe-i mezbûreye ber-vech-i muharrer vaz‘-ı yedini ikrâr ve vech-i meşrûh üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre sâkinlerinden Mehmed Efendi b. Mustafa Efendi ve İbrahim Beşe b. Hüseyin nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffât-ı mezbûre Fâtıma Hatun bt. Abdullah b. Abdullah hâl-i kemâl-i sıhhatinde işbu mevsûfe-i mezbûreyi mülkünde olduğu hâlde huzûrumuzda malından tahrîr ve i‘tâk ve silk-i harâir-i asliyâta idrâc ve ilhâk etmekle mevsûfe-i merkūme sâir asliyât gibi hürre olmuşdur biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ve ma‘an irsâl olunan Mehmed b. Hüseyin ve Mustafa b. Mehmed meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 19 min-şehri Rebî‘ülâhir sene 1110 Şuhûdü’l-hâl: Abdülvahab Efendi b. Musa, Süleyman Çelebi b. Mehmed, el-Hâc Ahmed b. el-Hâc Ali, Sun‘ullah Çelebi b. İbrahim, Mehmed Çelebi b. Mahmud, Hüseyin Beşe b. Ahmed.