Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 889 Hüküm no: 727 Orijinal metin no: [165b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden eşi Muharrem Efendi’de mehir bedelinden alacağı olduğunu ispat ettiği Mahmiye-i İstanbul’da Yarhisar mahallesi sükkânından olup Medîne-i münevvere kādısı iken vefât eden merhûm Muharrem Efendi b. Mustafa’nın verâseti zevce-i metrûkesi fahrü’l-muhadderât Şerife Âişe Hatun bt. mevle’l-merhûm nakībü’l-eşrâf es-Seyyid Cafer Efendi ile sagīre kızı Şerife Ümmügülsüm’e ve li-ebin karındaşı Ahmed Ağa’ya münhasıra olduğu şer‘an mütehakkik oldukdan sonra mezbûre Şerife Âişe Hatun tarafından husûs-ı âti’l-beyânda vekîl-i müsecceli fahrü’l-müderrisîn Murad Efendi b. Ali merhûm-ı mûmâ-ileyhin menzilinde akd olunan meclis-i şer‘-i şerîfde merhûm-ı mûmâ-ileyhin terekesine bi’l-verâse vâzı‘u’l-yed olan birâderi merkūm Ahmed Ağa mahzarında üzerine bi’l-vekâle da‘vâ ve takrîr-i kelâm edip müvekkilem mezbûre Şerife Âişe Hatun’un zevci merhûm-ı mûmâ-ileyh Muharrem Efendi b. Mustafa zimmetinde mütekarrir ve ma‘kūdun-aleyh beş yüz guruş mehr-i müeccel hakkı olup hattâ hâl-i kemâl-i sıhhatinde meblağ-ı mezbûr cihet-i mezbûreden müvekkile-i mezbûreye vâcibü’l-edâ deyni olduğunu şuhûd mahzarında ikrâr ve işhâd etdiğinden sonra zimmetinde iken vefât etmeğin terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mûmâ-ileyhden müdde‘âsına muvâfıka beyyine taleb olundukda mahalle-i mezkûrede sâkin merhûm-ı mûmâ-ileyhin mülâzımlarından Osman Efendi b. Mehmed Efendi ve kethüdâsı el-Hâc İbrahim Efendi b. Ahmed li-ecli’ş-şehâde meclis-i ma‘kūda hâzırân olup istişhâd olunduklarında fi’l-vâki‘ merhûm-ı mûmâ-ileyh Muharrem Efendi b. Mustafa hâl-i kemâl-i sıhhatinde müvekkile-i mezbûre içün zevcem Şerife Âişe Hatun’a zimmetimde mütekarrir vâcibü’l-edâ beş yüz guruş mehr-i müeccel deynim var deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf-i müvekkileti’l-mezbûre mûcebince ba‘de’l-hükm ve’t-tenbîh mâ-vaka‘a kayd-şüd. Fî 23 min-Cumâdelûlâ sene 1110 Şuhûdü’l-hâl: Umdetü’l-mevâli’l-izâm es-Seyyid Mehmed Efendi Kādı-i İzmir sâbıkā, Fahrü’l-müderrisîn Abdullah Efendi b. Mustafa, İbrahim Ağa Kethüdâ-yı Hazret-i Efendi, el-Hâc Mustafa b. Mehmed Acemzâde, Mahmud Çelebi b. Muharrem, el-Hâc Süleyman Çukadâ[r], Hüseyin Çelebi b. Mehmed, el-Hâc Mehmed b. Nuh, Mehmed Efendi b. Ali, Ahmed Çelebi b. Mustafa.