Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 890 Hüküm no: 728 Orijinal metin no: [165b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi’nin vefat eden eşi Fatıma’ya mehrini ödediğini ispat ettiği Husûs-ı âti’l-beyânın mahallinde istimâ‘ ve tahrîri içün bi’t-taleb cânib-i şer‘-i enverden me’zûnen irsâl olunan Süleyman Efendi b. el-merhûm Mehmed Efendi mahmiye-i İstanbul’da Hızır Bey mahallesinde sâkine iken bundan akdem vefât eden Fâtıma Hatun bt. Süleyman’ın sâkine olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin zâhirde zevc-i metrûku Ömer Çelebi b. Mehmed’den gayrı vâris-i ma‘rûfu olmamağla terekesinin nısfı mezbûr Ömer Çelebi’ye ve nısf-ı âharı cânib-i beytülmâle âid oldukdan sonra mahmiye-i mezbûrede bi’l-fi‘il beytülmâli’l-hâs emîni olan Mustafa Ağa b. Abdullah b. Abdülmennan tarafından husûs-ı âti’l-beyânda müseccel vekîli Mehmed Çelebi b. Mustafa meclis-i ma‘kūd-ı mezbûrda bâ‘isü’l-kitâb merkūm Ömer Çelebi mahzarında üzerine da‘vâ ve takrîr-i kelâm edip müteveffât-ı mezbûre Fâtıma Hatun’un zevci mezbûr Ömer Çelebi zimmetinde mütekarrir ve ma‘kūdun-aleyh üç bin akçe ile terekesinin nısfını bi’l-vekâle taleb ederim suâl olunsun dedikde gıbbe’s-suâl mezbûr Ömer Çelebi cevâbında mehr-i mezbûr üç bin akçeyi zevce-i müteveffât-ı mezbûre Fâtıma Hatun bt. Süleyman b. Abdullah’a târîh-i kitâbdan beş sene mukaddem def‘ u teslîm eyledim hattâ müteveffât-ı mezbûre hâl-i kemâl-i sıhhatinde mehr-i mezbûru ahz ü istîfâ eyledim ve üzerimde lâbis olduğum köhne libâsımdan mâ‘adâ ismi mal ıtlâk olunur bir şeyim yokdur deyü huzûr-ı Müslimînde ikrâr ve işhâd dahi etmişdir deyü def‘le mukābele ve istintâk olunsun dedikde gıbbe’l-istintâk ve’l-inkâr mezbûr Ömer Çelebi’den def‘-i meşrûhuna beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kasab Timurhan mahallesinde sâkin İmâm Ahmed Efendi b. Mustafa ve Mehmed Çelebi b. Şa‘bân ve Osman Efendi b. Mehmed li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Fâtıma bt. Süleyman b. Abdullah hâl-i kemâl-i sıhhatinde târîh-i kitâbdan beş sene mukaddem zevcim işbu Ömer Çelebi zimmetinde mütekarrir ve ma‘kūdun-aleyh üç bin akçe mehr-i müeccelimi yedinden ahz u istîfâ eyledim ve üzerimde lâbis olduğum köhne libâsımdan mâ‘adâ ismi mal ıtlâk olunur bir şeyim yokdur deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince vekîl-i mezbûru bî-vech mu‘ârazadan men‘ eylediğini mevlânâ-yı mezbûr mahallinde tahrîr ba‘dehû ma‘an irsâl olunan Hüseyin Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: Hüseyin Efendi b. Hasan, el-Hâc Ali b. Musa, İsmail Çelebi b. Mehmed, el-Hâc Ali b. Mustafa, Mehmed Çelebi b. Mustafa.