Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 891 Hüküm no: 729 Orijinal metin no: [166a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın vasiyet edip Mustafa Ağa’yı vasi tayin ettiği Husûs-ı âti’l-beyânın mahallinde ketb ü tahrîri içün savb-ı şer‘-i enverden bi’t-taleb irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Emin Sinan mahallesinde Abdullah Ağa b. İbrahim’in sâkin olduğu menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mezbûr Abdullah Ağa meclis-i ma‘kūd-ı mezbûrda hâfizü’l-kitâb Mustafa Ağa b. Hüseyin mahzarında ikrâr ve takrîr-i kelâm edip ben hasta ve alîl olmağla bi-emrillâhi te‘âlâ fevt olduğumda terekemi ahz u kabz edip Vilâyet-i Anadolu’da Mardin kasabasında sâkine kızlarım Havva ve Emetullah ile li-ebeveyn kız karındaşım olan mezbûr Mustafa Çelebi’nin vâlidesi Emine Hatun’a îsâl eyleye deyü vasiyet edip mezbûr Mustafa Ağa’yı vasiyy-i muhtâr nasb ü ta‘yîn eyledim dedikde ol dahi vesâyet-i mezbûreyi kabûl ve merâsimini edâya müte‘ahhid olduğunu mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Süleyman ve İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 12 min-Cumâdelâhire sene 1110 Şuhûdü’l-hâl: Fahrü’l-müderrisîn Mustafa Efendi b. Halil, es-Seyyid Mustafa Efendi b. Resul, es-Seyyid Mustafa Çelebi b. Ahmed, Osman Efendi b. Abdurrahman, el-Hâc Mehmed b. Yakub, Osman Efendi b. Ali, el-Hâc Abdi b. Ali.