Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 898 Hüküm no: 735 Orijinal metin no: [167a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İvaz ve annesi Kamerşah Hatun’un vefat eden Mehmed Efendi’nin varisleri olduklarını ispat ettikleri Fi’l-asl medîne-i Karahisar-ı Sâhib’de Vakıf Paşa mahallesi ahâlîsinden olup mahmiye-i İstanbul’da merhûm ve mağfûrun-leh Ebulfeth Gāzî Sultan Mehmed Hân hazretlerinin Akdeniz tarafında vâki‘ Çiftebaşı demekle ma‘rûf medrese-i şerîfleri hucerâtının birinde sâkin iken bundan akdem maktûlen vefât eden Mehmed Efendi b. Kara İsmail b. el-Hâc Mahmud’un li-ebeveyn karındaşı olduğunu iddi‘â eden İvaz nâm kimesne mahfil-i kazâda müteveffâ-yı mezbûrun vasiyy-i muhtârı olmağla terekesine vaz‘-ı yed eden Molla Mehmed b. Ahmed mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi benim li-ebeveyn karındaşım olup anamız ismi işbu hâzır bi’l-meclis Kamerşah Hatun bt. el-Hâc Hüseyin ve babamız ismi mezbûr Kara İsmail ve dedemiz ismi mezbûr el-Hâc Mahmud ve maskat-ı re’simiz zikr olunan Karahisar-ı Sâhib’de Vakıf Paşa mahallesidir müteveffâ-yı mezbûrun verâseti vâlidemiz işbu mezbûre Kamerşah Hatun ile usûbet-i nesebiye cihetinden bana münhasıradır bizden gayrı vâris ve terekesine âhar müstahık yoğiken vasiyy-i mezbûr terekesini bize teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin müdde‘î-i mezbûrun müdde‘âsını inkâr edicek müdde‘î-i mezbûrdan ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden olup mârrü’l-beyân Karahisar-ı Sâhib’de Akça Mescid mahallesinden olup müsâfiren Hocapaşa hanında sâkin Mehmed Çelebi b. Halil ve yine fi’l-asl medîne-i mezbûrede Eski hamam kurbünde Zeyrek mahallesinde olup mahmiye-i mezbûrede Süleymaniye mahallesinde sâkin Hasan Çelebi b. el-Hâc Abdullah nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Mehmed Efendi b. Kara İsmail b. el-Hâc Mahmud ile işbu müdde‘î-i mezbûr İvaz li-ebeveyn karındaşlar olup anaları ismi işbu hâzır bi’l-meclis Kamerşah bt. el-Hâc Hüseyin ve babaları ismi mezbûr Kara İsmail ve dedeleri ismi mezbûr el-Hâc Mahmud ve maskat-ı re’sleri medîne-i mezbûrede Vakıf Paşa mahallesidir müteveffâ-yı mezbûrun verâseti vâlidesi işbu hâzır bi’l-meclis Kamerşah Hatun ile müdde‘î-i mezbûra münhasıra olup mezbûrlardan gayrı vâris ve terekesine âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm mâ-vaka‘a kayd-şüd. Fî 7 min-Receb sene 1110 Şuhûdü’l-hâl: Yahya Efendi b. Mustafa, fahrü’l-müderrisîn es-Seyyid Abdülmuti Efendi, Nikâtî Ali Efendi Kâtibü’l-hurûf, Ahmed Çelebi b. Süleyman, İbrahim Çelebi b. Mehmed, Çukadâr el-Hâc Süleyman, Kara Mehmed el-Muhzır, Hüseyin Çelebi el-Muhzır ve gayruhum mine’l-huzzâr.