Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 899 Hüküm no: 736 Orijinal metin no: [167b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun vefat eden eşi Süleyman’da mehir bedeli alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Nikâtî Ali Efendi mahmiye-i İstanbul’da Ali Paşa-i atîk mahallesinde sâkin iken bundan akdem vefât eden Süleyman b. Ali b. Abdullah’ın menziline varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Ümmühani Hatun bt. Mustafa ve sulbiye sagīre kızı Âişe’ye münhasıra olduğu şer‘an zâhir ve müte‘ayyin oldukdan sonra zâtı mahalle-i mezbûre sâkinlerinden Mustafa Çelebi b. Zülfikâr ve Kethüdâ Ahmed Ağa b. Abdülbaki ta‘rîfleriyle mu‘arrefe olan mezbûre Ümmühani Hatun meclis-i ma‘kūd-ı mezbûrda sagīre-i mezbûrenin kıbel-i şer‘den vasiyy-i mansû<>bu olan Mehmed Çelebi b. Ahmed mahzarında üzerine da‘vâ ve takrîr-i kelâm edip müteveffâ-yı mezbûr Süleyman Efendi b. Ali b. Abdullah târîh-i kitâbdan dört ay mukaddem tezevvüc murâd eylediğinde yetmiş guruş mehr-i müeccel tesmiyesiyle huzûr-ı Müslimînde beni tezevvüc ve kabûl edip hattâ târîh-i kitâbdan bir ay mukaddem ber-vech-i muharrer zimmetinde mütekarrir ve ma‘kūdun-aleyh yetmiş guruş mehr-i müeccel bana deyni olduğunu huzûr-ı Müslimînde ikrâr dahi edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden olup mahalle-i mezbûrede sâkin mu‘arrifân-ı mezbûrân Kethüdâ Ahmed Ağa b. Abdülbaki ve Mustafa Çelebi b. Zülfikâr li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Süleyman Efendi b. Ali b. Abdullah ber-vech-i muharrer müdde‘iye-i mezbûre[ye] yetmiş guruş mehr-i müeccel zimmetinde mütekarrir ve ma‘kūdun-aleyh deyni olduğunu huzûrumuzda târîh-i mezbûrda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr Nasuh Beşe b. Abdullah ve Kara Mehmed b. Abdullah ile meclis-i şer‘a gelip her biri vukū‘u üzere inhâ ve takrîr etmeğin mâ-vaka‘a kayd-şüd. Fî 15 min-Receb sene 1110 Şuhûdü’l-hâl: Mehmed Çelebi b. Ahmed, Berber Muslu Beşe b. ( ), Mustafa Çelebi b. Musa, Abdülhalim Çelebi [b.] [Abdü]lhakim, Ahmed b. Abdullah, Mehmed Çelebi b. Abdülkerim, Hasan Çelebi b. Mehmed.