Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 900 Hüküm no: 737 Orijinal metin no: [167b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasabbaşı Mehmed Ağa vefat eden Hattat Osman Efendi’de alacağı olduğunu ispat ettiği Mahmiye-i İstanbul’da Hocapaşa mahallesi ahâlîsinden olup hâlâ ordu-yı hümâyûnda kasabbaşı olan umdetü’l-a‘yân Mehmed Ağa b. İskender b. Abdullah tarafından husûs-ı âti’l-beyânda vekîl olduğu mahmiye-i mezbûrede Kocamustafapaşa mahallesinde sâkin Ömer Efendi b. Hüseyin ve Kızıltaş mahallesinde sâkin Mustafa Ağa b. Abdullah şehâdetleriyle mahzar-ı hasm-ı câhidde sâbit ve sübût-ı vekâletine hükmolunan bâ‘isü’l-kitâb el-Hâc Ali b. Receb meclis-i şer‘-i şerîfde mahmiye-i mezbûrede Sancakdâr Hayreddin mahallesi ahâlîsinden olup bundan akdem vefât eden Hattat Osman Efendi b. Ali’nin evlâd-ı sıgārının vasiyy-i şer‘îleri olmağla terekesine vaz‘-ı yed eden Ahmed Efendi b. Ali mahzarında üzerine da‘vâ ve takrîr-i kelâm edip müvekkilim mezbûr Mehmed Ağa müteveffâ-yı mezbûr Hattat Osman Efendi b. Ali b. Sinan’a bin yüz dokuz senesi Ramazan-ı şerîfi’nde kendi menzilinde kendi hattıyla bir Mushaf-ı şerîf tahrîr etmek içün iki yüz elli guruş olmak üzere yüz aded tuğrâlı altın ücret verip ol dahi ba‘de’l-kabz Mushaf-ı şerîfi kable’t-tahrîr fevt olmağla terekesinden bi’l-vekâle taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Mirâhur mahallesinde sâkin Ali Çelebi b. Mustafa ve mezbûr Mustafa Ağa b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müvekkil-i mezbûr Mehmed Ağa b. İskender b. Abdullah müteveffâ-yı mezbûr Hattat Osman Efendi b. Ali b. Sinan’a bin yüz dokuz senesi Ramazan-ı şerîfi’nde kendi menzilinde kendi hattıyla bir Mushaf-ı şerîf tahrîr etmek içün iki yüz elli guruş olmak üzere huzûrumuzda yüz aded tuğrâlı altın ücret verip ol dahi yedinden ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemînü’l-müvekkili’l-mezbûr mûcebiyle ba‘de’l-hükm mâ-vaka‘a kayd-şüd. Fî 9 min-Recebi’l-ferd sene 1110 Şuhûdü’l-hâl: Rûşenî Mehmed Efendi b. İbrahim, el-Hâc Mustafa b. Mehmed, Abdurrahman Efendi b. Ahmed Efendi, el-Hâc Süleyman b. Mehmed, Hüseyin Çelebi b. Mehmed.