Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 901 Hüküm no: 738 Orijinal metin no: [167b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’nin vefat eden kayınpederindeki alacağını sulh yoluyla varislerden aldığı Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘den me’zûnen Mevlânâ Nuh Efendi b. Musa irsâl olunup ol dahi mahmiye-i İstanbul’da Kasab İvaz mahallesinde sâkine Emine Hatun bt. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Muhyiddin-i Kocavî mahallesinde sâkin iken bundan akdem garîkan vefât eden el-Hâc Mehmed’in verâseti zevce-i menkûha-i metrûkesi Emine Hatun bt. Mustafa ile sulbiye kebîre kızları Âişe ve Hadîce ve kebîr oğlu Mustafa Çelebi’ye münhasıra oldukdan sonra müteveffâ-yı mezbûrun dâmadı Osman Beşe b. Abdullah meclis-i ma‘kūd-ı mezbûrda ashâbü’l-kitâb mezbûrûn Emine Hatun ve Âişe Hatun ve Hadîce Hatun ve Mustafa mahzarlarında ikrâr ve takrîr-i kelâm edip müteveffâ-yı mezbûr el-Hâc Mehmed’e bana bir yeniçeri esâmesi alıvermek içün bi-tarîkı’r-rüşve altmış guruş alıp meblağ-ı mezbûru kable’l-edâ fevt olmağla meblağ-ı mezbûru verese-i mezbûrûndan da‘vâ ve taleb eylediğimde beynimize muslihûn tavassut edip on yedi buçuk guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûru vârisûn-ı mezbûrûn yedlerinden tamâmen alıp kabz ve bâkī kırk iki buçuk guruşa müte‘allık âmme-i de‘âvî ve mutâlebât ve eymân [ve] muhâsamâtdan verese-i mezbûrûnun zimmetlerini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Ahmed Çelebi b. Süleyman ve Mustafa b. Abdi ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 9 min-Receb sene 1110 Şuhûdü’l-hâl: Hamza Efendi b. Mehmed, İmâm Mehmed Efendi b. el-Hâc Mustafa, Müezzin Mehmed Efendi b. Yusuf, el-Hâc Ebubekir Odabaşı b. Hüseyin, el-Hâc İsmail Çelebi b. İsmail, Mustafa Halîfe b. Dilaver, Osman Beşe b. Abdullah.