Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 902 Hüküm no: 739 Orijinal metin no: [168a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un evini oğlu Mustafa Çelebi’ye sattığı Kezâlik akd-i meclis-i şer‘-i şerîf ettikde zâtı mahalle-i mezbûrede sâkin Solak Şahin Bey b. Abdullah ve el-Hâc Ahmed Ağa b. Abdurrahman ta‘rîfleriyle mu‘arrefe olan mezbûre Emine Hatun meclis-i ma‘kūd-ı mezbûrda işbu hâfızü’l-kitâb kebîr oğlu Mustafa Çelebi b. Mehmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafı Hadîce Hatun bt. Mehmed mülkü ve bir tarafı Kuyumcubaşı oğlu Mehmed Çelebi mülkü ve bir tarafı mahalle-i mezbûre mescid-i şerîfi duvarı ve bir tarafı tarîk-i âm ile mahdûd hâriciyesinde fevkānî bir bâb oda ve bir bâb sagīr oda ve tahtında bir ahır ve bir kenîf ve bir mikdâr havlu ve dâhiliyesinde fevkānî iki bâb oda ve bir sofa ve iki tahta-pûş ve bir sagīr kiler ve bir kenîf ve tahtânî bir matbah ve bir mahtab ve bi’r-i mâ ve bir sagīr hamam ve havlu ve cüneyneyi müştemil mülk menzilimi cümle tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğlum mezbûr Mustafa Çelebi’ye beş yüz guruşa bey‘ u teslîm ve temlîk ol dahi iştirâ ve kabz u kabûl eyledikden sonra semeni olan meblağ-ı mezbûr beş yüz guruş mutâlebesinden mezbûr Mustafa Çelebi’nin zimmetini ibrâ-i âmm-ı katı‘u’n-nizâ‘la ibrâ ve iskāt eyledim ba‘de’l-yevm menzil-i mahdûd-ı mezbûr oğlum merkūm Mustafa Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb [ü] tahrîr ba‘dehû ma‘an irsâl olunan Ahmed Çelebi b. Süleyman ve Mustafa b. Abdi ile meclis-i şer‘a gelip inhâ ve takrîr etmeğin mâ-vaka‘a kayd-şüd. Fî 9 min-Receb sene 1110 Şuhûdü’l-hâl: Eş-şâhidûnü’s-sâbikūn.