Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 902 Hüküm no: 740 Orijinal metin no: [168a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Çelebi’nin vefat eden ortağı Nalbur Mustafa’ya ait hissesini varislerine ödemesi Mahmiye-i İstanbul’da Kumkapı kurbünde Cerrâh İshak Bey mahallesinde sâkin iken bundan akdem vefât eden Na‘lbur el-Hâc Mustafa b. Ahmed’in verâseti zevce-i metrûkesi Hadîce Hatun bt. el-Hâc Hüseyin ile sulbî sagīr oğlu Mehmed ve sagīre kızı Kerime’ye münhasıra ve mezbûre Hadîce Hatun evlâdı sagīrân-ı mezbûrânın tesviye-i umûruna min-kıbeli’l-ebb vasiyy-i muhtârları olduğu şer‘an mütehakkik oldukdan sonra mezbûre Hadîce Hatun’un hâlâ zevci ve tarafından asâleten ve vesâyeten husûs-ı âti’l-beyânda vekîl olduğu mazmûnu müsbet hüccet-i şer‘iyye ile sâbit olan Hüseyin Çelebi b. Mehmed meclis-i şer‘-i şerîfde İznikmid kasabası sükkânından olup hâlâ mahalle-i mezbûrede müsâfiren sâkin müteveffâ-yı mezbûrun mudârıbı Kayyumzâde demekle ma‘rûf Halil Çelebi b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mustafa hayâtında kendi malından bin beş yüz guruşunu mudârebe bi’n-nısf tarîkıyle mezbûr Halil Çelebi’ye def‘ u teslîm ol dahi kabz ü tesellüm ve kabûl ve üç senede i‘mâlinden i‘tirâfı üzere mezbûr el-Hâc Mustafa’nın hissesine iki yüz doksan altı guruş ribh âid oldukdan sonra mezbûr el-Hâc Mustafa vefât etmekle mezbûr Halil Çelebi asl-ı mal-ı mezbûrun bin üç yüz altmış altı guruşla bir zolotasını bana edâ ve teslîm ben dahi vekâletim hasebiyle yedinden ahz u kabz edip asl-ı maldan bâkī yüz otuz üç guruşla bir sülüsü ve hisse-i ribh olan meblağ-ı mezbûr iki yüz doksan altı guruşu dahi mezbûr Halil Çelebi’den taleb ederim suâl olunsun dedikde gıbbe’s-suâl mezbûr Halil Çelebi cevâbında kaziyye vech-i meşrûh üzere olduğunu ikrâr lâkin ribh-i mezbûrun yüz kırk altı guruşunu müteveffâ-yı mezbûr el-Hâc Mustafa’ya hayâtında edâ ve teslîm eyledim ve mal-ı mezbûrun yüz guruşu Hamal Tayyib müflis zimmetinde bilâ-nakd hâlik olmağla nısfı mezbûr el-Hâc Mustafa’nın hissesine lâzım gelir deyü meblağ-ı mezbûrun yüz doksan altı guruşu def‘le mukābele ve asl-ı mal ve ribhden bâkī cem‘an iki yüz otuz üç guruşla bir sülüs yedinde mevcûd olmak üzere i‘tirâf etmeğin mudârib-i mezbûr husûs-ı mezbûrda emîn olup yemîniyle musaddık olmağla fi’l-hakīka ribh-i mezbûrun yüz kırk altı guruşunu mezbûr el-Hâc Mustafa’ya hayâtında edâ ve teslîm edip yedinde ve zimmetinde kalmadığına ve müflis-i mezbûrun zimmetinde olan meblağ-ı mezbûr mal-ı mudârebeden olup te‘addî ve taksîr etmediğine mezbûr Halil Çelebi’ye yemîn teklîf olundukda ol dahi [alâ-] vefki’l-mesûl yemîn billâhi te‘âlâ etmeğin mûcebince meblağ-ı mezbûr yüz doksan altı guruş talebiyle mezbûr Hasan Çelebi mudârib-i mezbûra mu‘ârazadan men‘ olundukdan sonra i‘tirâfı üzere meblağ-ı mevcûd-ı mezbûr iki yüz otuz üç guruşla bir sülüsü mezbûr Hasan Çelebi’ye edâ ve teslîme mudârib-i merkūm Halil Çelebi’ye tenbîh olunup mâ-vaka‘a kayd-şüd. Fî 5 min-Receb sene 1110 Şuhûdü’l-hâl: Ahmed Bey b. Süleyman, Ali Beşe b. Musa, Hüseyin Çelebi b. Mehmed, Nasuh Beşe b. ( ) Çukadâr.