Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 903 Hüküm no: 741 Orijinal metin no: [168a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırküçüncü Ağa Bölüğü Odası Para Vakfı’na borçlu olarak vefat eden Abdullah Çelebi’nin rehin bıraktığı evin satılıp borcunun ödenmesi Dergâh-ı âlî yeniçerilerinin kırk üçüncü ağa bölüğü odası neferâtının mühimmâtına mevkūfe nukūdun bi’l-fi‘il mütevellîsi bâ‘isü’l-kitâb Ahmed Ağa b. Abdullah mahfil-i kazâda mahmiye-i İstanbul’da Sarı Nasuh mahallesinde sâkinen fevt olan Abdullah Çelebi b. Piyale b. Abdullah’ın kebîr oğlu Ebubekir Çelebi mahzarında üzerine da‘vâ ve takrîr-i kelâm [edip] müteveffâ-yı mezbûr Abdullah Çelebi hayâtında mal-ı vakf-ı mezbûrdan olmak üzere bin yüz sekiz senesi şehr-i Rebî‘ülâhiri’nin on beşinci günü yedimden nakd iki yüz guruş ve yedimden müşterâ mal-ı vakfdan eşyâ-i mütenevvi‘a esmânından dahi iki yüz guruş cem‘an ciheteyn-i mezbûre[te]ynden zimmetinde cânib-i vakfa dört yüz guruş deyni olup mukābelesinde mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzili ba‘de’t-tahliyeti’ş-şer‘iyye rehin vaz‘ ve teslîm ben dahi ber-vech-i muharrer irtihân ve tesellüm ve kabz eylediğimden sonra menzil-i mezbûru ba‘de’l-müzâyede semen-i misli ile âhara bey‘ ve kabz <> ve semeninden deyn-i mezkûreyi edâya ve fazlasını kendüye îsâle azl ü in‘izâlden masûne vekâlet-i devriye ile işbu hâzır bi’l-meclis Osman Bey b. Ramazan’ı tarafından vekîl nasb ü ta‘yîn eyledikde ol dahi vekâlet-i mezbûreyi kabûl eylediğini târîh-i mezbûrda mahmiye-i mezbûrede Davudpaşa Mahkemesi’nde nâibü’ş-şer‘i’ş-şerîf olan es-Seyyid Mehmed Efendi b. el-Hüseyin huzûrunda ikrâr ve yedime işbu hüccet-i şer‘iyyeyi verip meblağ-ı mezbûru kable’l-edâ ve’l-fek fevt olmağla menzil-i mezbûru ba‘de’l-müzâyede semen-i misline bey‘ ve semeninden meblağ-ı mezbûru edâya mezbûrân Ebubekir ve Osman Bey’e tenbîh olunmak matlûbumdur deyü mazmûnu min-külli’l-vücûh takrîr-i meşrûhuna mutâbık hüccet-i şer‘iyye ibrâz ve mezbûrândan istintâk olunsun dedikde gıbbe’l-istintâk ve’l-inkâr mütevellî-i mezbûrdan mazmûn-ı hüccet-i mezbûreye beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Cezerî Kasım Paşa mahallesinde sâkin ve zeyl-i hüccetde ismi mastûr İbrahim Beşe b. Yakub ve Sofular mahallesinde sâkin Receb Beşe b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Abdullah Çelebi b. Piyale b. Abdullah târîh-i mezbûrda vakf-ı mezbûra ciheteyn-i mezbûreteynden dört yüz guruş deyni olup meblağ-ı mezbûr mukābelesinde menzil-i mahdûd-ı mezbûru mütevellî-i mezbûra ba‘de’t-tahliyeti’ş-şer‘iyye rehin vaz‘ ü teslîm ol dahi irtihân ve tesellüm ve kabz eyledikden sonra menzil-i mezbûru ba‘de’l-müzâyede semen-i misli ile âhara bey‘a ve semeninden deyn-i mezbûru edâya ve fazlasını kendüye îsâle mezbûr Osman Bey’i vekîl edip mezbûr Osman Bey dahi vekâlet-i mezbûreyi kabûl eylediğini nâib-i müşârün-ileyh huzûrunda ikrâr ve yedine işbu hüccet-i şer‘iyyeyi def‘ eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de ri‘âyeti şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 10 min-Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, Pîrîzâde Mehmed b. Mehmed, Ahmed Çelebi b. Süleyman, Hasan Çelebi b. Abdullah, İbrahim b. Mehmed, Hüseyin b. ( ) ve gayruhum mine’l-huzzâr.