Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 905 Hüküm no: 742 Orijinal metin no: [168b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ali Çelebi’nin mütevellisi olduğu Kâtib Muslihiddin Mahallesi Mescidi Para Vakfı’nın müteveffa Balizade Mehmed Efendi’de alacağı olduğunu ispat ettiği Mahmiye-i İstanbul’da Kâtib Muslihiddin mahallesi mescid-i şerîfinin nukūd-ı mevkūfesine mütevellî olan bâ‘isü’l-kitâb Berber Ali Çelebi b. Receb mahfil-i kazâda mahrûse-i Edirne’de müsâfiren sâkin iken bundan akdem vefât eden Balizâde Mehmed Efendi b. Habib Efendi’nin sagīr oğulları Mehmed ve Said Mehmed Reşid’in tesviye-i emrlerine kıbel-i şer‘den vasî nasb ü ta‘yîn olunan fahrü’l-kuzât Nimetullah Efendi b. el-merhûm el-Hâc Mehmed Efendi tarafından husûs-ı âti’l-beyânda vekîl olduğu merhûmun etbâ‘ından Yusuf Çelebi b. Abdullah ve Mustafa Beşe b. Ahmed şehâdetleriyle mahzar-ı hasm-ı câhidde sâbit olup sübût-ı vekâletine hükmolunan karındaşı Ahmed Çelebi b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Mehmed Efendi b. Habib Efendi hayâtında bin yüz yedi senesi Zilka‘desi gurresinde mal-ı vakf-ı mezbûrdan benim yedimden seksen guruş istidâne ve kabz edip mukābelesinde karanfilî bir sof ve bir kında yedi bıçak ve üç kınlı ve biri kınsız dört bıçak ve bir beyâz kutnî kapama ve bir peşmî ve bir sâhibî üç kapama ve beş aded alaca terlik ve bir şala kaplı beden kürkü ve bir çift Bursa yasdığı ve bir pâreli bohça ve bir bakır çubukdan rahtını bana rehin vaz‘ ü teslîm ben dahi irtihân ve kabz u kabûl eylediğimde yedime işbu deyn temessüğünü verip kable’l-edâ ve’l-fek fevt olmağla taleb ederim vekîl-i mezbûra suâl olunup edâ-i deyn ve fekk-i rehne tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kabakulak mahallesinde sâkin Halil Dede b. Mustafa ve merhûmun etbâ‘ından mezbûr Yusuf Çelebi b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hayâtında târîh-i merkūmda mal-ı vakf-ı mezbûrdan mütevellîsi işbu müdde‘î-i merkūm Berber Ali Çelebi yedinden huzûrumuzda seksen guruş istidâne ve kabz edip mukābelesinde eşyâ-i memlûkesinden işbu karanfilî bir sof ve bir kında yedi bıçak ve üçü kınlı ve biri kınsız dört bıçak ve bir beyâz kutnî ve bir peşmî ve bir sâhibî üç kapama ve beş alaca terlik ve bir şala kaplı beden kürkü ve bir çift Bursa yasdığı ve bir pâreli bohça ve bir bakır çubukdan rahtını müdde‘î-i mezbûr yedine rehin vaz‘ ve teslîm ol dahi irtihân ve kabz eyledikde yedine deyn temessüğünü verdi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi, el-Hâc Hüseyin b. Receb, İbrahim Kethüdâ, Ahmed Çelebi b. Süleyman, Hasan Çelebi b. Abdullah.