Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 915 Hüküm no: 753 Orijinal metin no: [170b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın küçükken vasiliğini yaptığı kız kardeşi Emetullah Hatun ile alacak-verecek meselesinde zimmetini ibra ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i enverden me’zûnen irsâl olunan Mevlânâ Veli Efendizâde Mehmed Efendi mahmiye-i İstanbul’da Timurtaş mahallesinde fahrü’t-tüccâr el-Hâc Ramazan b. Halil’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Küçükpazar’da Hoca Hayreddin mahallesinde sâkin iken bundan akdem vefât eden Keresteci el-Hâc Hüseyin Çelebi b. Hasan’ın sulbî kebîr oğlu fahrü’l-a‘yân Osman Ağa meclis-i ma‘kūd-ı mezkûrda müteveffâ-yı mezbûrun sulbiye kızı ve sin ve cüssesinin bülûğa tahammülü ve bülûğuna rüşdünün inzimâmı mahalle-i mezbûrede sâkin Abdullah Efendi b. el-Hâc Mustafa ve Salih Çelebi b. el-Hâc Mahmud ve Mehmed Sıdkı b. Ömer ve el-Hâc Ali Ağa b. Şa‘bân nâm kimesneler şehâdetleriyle bülûğ ve rüşdüne hükmolunup hâlâ zât-ı zevc olan işbu Emetullah Hatun mahzarında üzerine da‘vâ ve takrîr-i kelâm edip mezbûre Emetullah Hatun’un hâl-i sıgārında tesviye-i umûruna ben bâ-hüccet-i şer‘iyye vasiyy-i muhtâr olup ve babamız müteveffâ-yı mezbûrun işbu yedimde olan kassâm defteri mûcebince menkūl kısmından olan mecmû‘-ı terekesi düyûn-ı müsbetesine bâ-hüccet-i şer‘iyye verilip menkūl kısmından bir şey bâkī kalmayıp ve mezbûre Emetullah’ın cihâzı levâzımı görülmek lâzım gelmeğin mezbûre Emetullah’ın bülûğundan sonra malımdan bi-şartı’r-rücû‘ işbu yedimde olan defter-i müfredât mûcebince cem‘an altı yüz yirmi bir guruş cihâzı levâzımına mezbûre Emetullah’ın izniyle malımdan masrûfum olmağla meblağ-ı mezbûru mezbûreden taleb ederim suâl olunsun dedikde gıbbe’s-suâl mezbûre Emetullah Hatun cevâbında fi’l-hakīka karındaşım merkūm Osman Ağa’nın yedinde olan müfredât defteri mûcebince cihâz levâzımı içün sen malından bi-şartı’r-rücû‘ altı yüz yirmi bir guruş harc ü sarf eyle ba‘dehû ben sana edâ ederim deyü merkūm Osman Ağa’ya emr eyledim ol dahi ba‘de’l-bülûğ emrime binâen meblağ-ı mezbûru defter-i müfredât mûcebince levâzım-ı cihâzıma harc ü sarf edip ve iştirâ eylediği eşyâyı ferden ferdâ kıymetleriyle yedime teslîm edip ben dahi ba‘de’l-kabz merkūm Osman Ağa’ya cem‘an deynim olan meblağ-ı mezbûr altı yüz yirmi bir guruşun seksen guruşu mukābelesinde mu‘accel nâmına kabz olunan seksen guruşa merkūm Osman Ağa’ya takas ol dahi mukāssa ve kabûl ve üç yüz guruş mukābelesinde vakıf akārlarından Odunkapısı hâricinde Sebzehâne kurbünde vâki‘ Ayasofya vakfından ve Haseki vakfından cem‘an on iki akçe yevmiye akārlarım hisselerini ma‘rifet-i mütevellî ile üç yüz guruş bedel mukābelesinde âhara ferâğ ve tefvîz ve bedeli olan üç yüz guruşu merkūm Osman Ağa’ya cihâzdan deynim olan üç yüz guruşa takas ettiğimde ol dahi mukāssa ve kabûl edip ve bâkī iki yüz kırk bir guruş deynim mukābelesinde yine mevzi‘-i mezkûrda Keresteciler[‘de] vâki‘ iki aded Haseki vakfından olan keresteci dükkânlarında olan hisselerimi ve yine Basamacılar’da vâki‘ Haseki vakfından ve Ayasofya vakfından olan beşer hissede bir hisse vakıf akārlarını ma‘rifet-i mütevellî ile iki yüz kırk bir guruş bedel mukābelesinde merkūm Osman Ağa’ya ferâğ ve tefvîz ve bedel-i ferâğ olan meblağ-ı mezbûru cihâzdan bâkī iki yüz kırk bir guruş deynim içün mezbûr Osman Ağa’ya takas ettiğimde ol dahi mukāssa ve kabûl edip cem‘an cihâzım içün merkūm Osman Ağa’nın masrûfu olan meblağ-ı mezbûr altı yüz yirmi bir guruşdan zimmetim berî olmuşdur dedikde gıbbe’t-tasdîk mezbûre Emetullah Hatun yine meclis-i ma‘kūd-ı mezkûrda merkūm Osman Ağa mahzarında ikrâr ve takrîr-i kelâm edip babam müteveffâ-yı mezbûrun fevti târîhinden târîh-i kitâba gelince merkūm Osman Ağa’nın yedinde olan hüccet-i nafaka mûcebince nafaka-i mefrûzamı yedinden tamâmen ahz u kabz eyledim ve husûs-ı mîrâsa müte‘allıka ve vakıf akārlarıma müte‘allıka cemî‘ de‘âvî ve mutâlebât ve eymân ve muhâsamâtdan merkūm Osman Ağa’nın zimmetini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Abdullah ve Nasuh b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 4 şehri Rebî‘ülâhir sene 1110 Şuhûdü’l-hâl: el-Hâc Ali Ağa b. Şa‘bân, el-Hâc Halil b. İbrahim, Mehmed Yazıcı b. Süleyman, Abdullah Efendi b. el-Hâc Mustafa, el-Hâc Ramazan b. Halil, İsmail Çelebi b. Halil, el-Hâc Yusuf b. Abdullah.