Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 916 Hüküm no: 754 Orijinal metin no: [170b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Fatıma Hatun’un varislerinden Zeyneb Hatun ile oğlu Hasan’ın miras hissesinden Attar Hasan’da alacakları olduğunu ispat ettikleri Mahmiye-i İstanbul’da Laleliçeşme kurbünde Ahmed Ağa mahallesinde sâkine iken bundan akdem vefât eden Fâtıma bt. el-Hâc Hasan nâm hatunun verâseti zevc-i metrûku İsmail Çelebi b. Attâr el-Hâc Hasan’la hâlâ Mekke-i mükerreme’de sâkine vâlidesi Zeyneb Hatun bt. Abdullah b. Abdurrahman’a ve li-ümmin karındaşları Hasan ve Hadîce nâm sagīrâna münhasıra olup ba‘dehâ mezbûre Hadîce dahi fevt olup verâseti vâlidesi mezbûre Zeyneb’e ve li-ebeveyn karındaşı sagīr-i mezbûr Hasan’a münhasıra ve mezbûre Zeyneb oğlu sagīr-i mezbûr Hasan b. Mehmed’in tesviye-i umûruna mansûbe vasiyesi olduğu şer‘an mütehakkık oldukdan sonra mezbûre Zeyneb Hatun tarafından vech-i âtî üzere vekâlet iddi‘â eden mahmiye-i mezbûrede Kumkapı kurbünde İbrahim Paşa mahallesinde sâkin Baltacı el-Hâc Ali b. Mahmud meclis-i şer‘-i şerîfde sagīr-i mezbûr ile mezbûre Zeyneb’in müteveffât-ı mezbûre Fâtıma terekesinden hisse-i irsiyelerini kabz ve îsâle kıbel-i şer‘den vasî ve kayyım nasb ü ta‘yîn olunmağla zikri âtî meblağa vâzı‘u’l-yed olan mezbûr Attâr el-Hâc Hasan mahzarında üzerine da‘vâ ve takrîr-i kelâm edip yedimde olan işbu vekâlet hücceti nâtıka olduğu üzere bin yüz dokuz senesi Muharremi’l-harâmı’nın yirmi sekizinci gününde Mekke-i mükerreme’de nâibü’ş-şer‘i’ş-şerîf olan Mustafa Efendi huzûrunda mezbûre Zeyneb Hatun bt. Abdullah b. Abdurrahman asâlet ve vesâyeti hasebiyle kendüye ve sagīr oğlu mezbûr Hasan’a müteveffât-ı mezbûre Fâtıma’nın terekesinden isâbet <> ve intikāl edip işbu defter-i kassâm-ı askeriye mastûr ve mezbûr el-Hâc Hasan yedinde makbûz olan dokuz yüz yetmiş iki buçuk guruş hisse-i irsiyelerini mezbûr Attâr el-Hâc Hasan’dan taleb ve da‘vâ ve ahz u kabza ve kendüye îsâl ve irsâle tarafından beni vekîl ve nâib-i menâb nasb ü ta‘yîn edip [171a] ben dahi vekâlet-i mezbûreyi kabûl ettiğimden sonra nâib-i mûmâ-ileyh ba‘de’t-ta‘rîfi’ş-şer‘î mezbûrenin tevkîlini tahrîr ve yedime işbu hüccet-i şer‘iyyeyi vermişidi hâlâ vekâletim hasebiyle meblağ-ı mezbûru merkūm el-Hâc Hasan’dan taleb ederim suâl olunsun dedikde gıbbe’s-suâl mezbûr el-Hâc Hasan cevâbında mezbûrân Hasan ve vâlidesi Zeyneb’in hisseleri olan meblağ-ı mezbûr dokuz yüz yetmiş iki buçuk guruşu defter mûcebince bi’l-vesâye makbûzu ve hâlâ yedinde mevcûd olduğunu ikrâr lâkin müdde‘î-i mezbûrun vekâletini inkâr edicek müdde‘î-i mezbûrdan sıdk-ı makāline beyyine taleb olundukda zeyl-i hüccetde mastûrü’l-esâmî olup mahmiye-i mezbûrede Hocapaşa mahallesinde sâkin el-Hâc Mehmed b. Davud ve Üsküdar’da Kazasker mahallesinde sâkin el-Hâc Süleyman b. Hamza li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu vekâlet hücceti nâtıka olduğu üzere bin yüz dokuz Muharremi’l-harâmı’nın yirmi sekizinci gününden Mekke-i mükerreme’de nâibü’ş-şer‘i’ş-şerîf olan mûmâ-ileyh Mustafa Efendi huzûrunda müteveffât-ı mezbûre Fâtıma bt. el-Hâc Hasan’ın vâlidesi mezbûre <> Zeyneb Hatun bt. Abdullah b. Abdurrahman asâlet ve vesâyeti hasebiyle kendüye ve sagīr oğlu mezbûr Hasan b. Mehmed’e müteveffât-ı mezbûre Fâtıma’nın terekesinden isâbet ve intikāl edip işbu defter-i kassâm-ı askerîde mastûr ve mezbûr Attâr el-Hâc Hasan yedinde makbûz olan meblağ-ı mezbûr dokuz yüz yetmiş iki buçuk guruş hisse-i irsiyelerini mezbûr el-Hâc Hasan’dan taleb ve da‘vâ ve ahz u kabza ve kendüye îsâl ve irsâle tarafından huzûrumuzda işbu müdde‘î-i mezbûr el-Hâc Ali’yi vekîl ve nâib-i menâb nasb ü ta‘yîn edip ol dahi vekâlet-i mezbûreyi kabûl ettiğinden sonra nâib-i mûmâ-ileyh ba‘de’t-ta‘rîfi’ş-şer‘î mezbûrenin tevkîlini tahrîr ve vekîl-i mezbûrun yedine işbu hüccet-i şer‘iyyeyi vermişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh vekîl-i mezbûr el-Hâc Ali meclis-i şer‘de vasiyy-i mezbûr el-Hâc Hasan mahzarında ikrâr-ı tâm ve takrîr-i kelâm edip ânifen edâsına hükm-i şer‘î lâhık olan meblağ-ı mezbûr dokuz yüz yetmiş iki buçuk guruşu vekâlet-i müsbetem hasebiyle işbu meclis-i şer‘de mezbûr el-Hâc Hasan yedinden bi’t-tamâm ve’l-kemâl ahz u kabz eyledim meblağ-ı mezbûrdan merkūm el-Hâc Hasan yedinde bir akçe ve bir habbe bâkī kalmamışdır dedikde gıbbe’t-tasdîkı’ş-şer‘î yine vekîl-i merkūm el-Hâc Ali husûs-ı mezbûr içün taraf-ı şer‘den hasbî nâzır ta‘yîn olunup nezâreti kabûl eden umdetü’l-havâssi’l-muvakkırîn Sakābaşı İbrahim Ağa b. Yusuf muvâcehesinde ikrâr u i‘tirâf edip ber-vech-i muharrer ahz u kabz eylediğim meblağ-ı mezbûru kendi malıma halt ve istihlâk etmekle hâlâ meblağ-ı mezbûr dokuz yüz yetmiş iki buçuk guruş mezbûrân Zeyneb Hatun ve oğlu sagīr Hasan’a zimmetimde vâcibü’l-edâ deynim olmuşdur dedikde gıbbe’t-tasdîkı’l-vicâhî ikinci sakābaşı olan fahrü’l-havâs Mehmed Ağa b. Abdullah meblağ-ı mezbûra bi’l-emr ve’l-kabûl kefâlet-i tâmme ile kefîl olmağın mâ-vaka‘a kayd-şüd. Fî 10 min-Recebi’l-ferd sene 1110 Şuhûdü’l-hâl: Fahrü’l-müderrisîni’l-kirâm Abdurrahman Efendi b. el-İzzî, fahrü’l-eşbâh Sakābaşı İvaz Ağa, el-Hâc Eyüb Ağa b. Osman, el-Hâc Hüseyin Ağa [Emîn-i] beytülmâl, Hüseyin Ağa b. İbrahim, Ahmed Şemsi Efendi fahrü’l-müderrisîn, Mehmed Efendi dâmad-ı Ömer Efendi, Nuh Efendi b. Musa, Şerif Mehmed Efendi, el-Hâc Süleyman Çukadâr, Ahmed Çelebi b. Süleyman el-Muhzır, Kayyumbaşı Mustafa Efendi, Kara Mehmed el-Muhzır.