Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 918 Hüküm no: 755 Orijinal metin no: [171a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malkoç Süleyman Ağa Para Vakfı’nın mütevellisi Hacı Kadri’nin vefat eden Hattat Osman Efendi’nin vakfa borcu olduğunu ispat ettiği Mahmiye-i İstanbul’da Malkoç Süleyman Ağa nâm sâhibü’l-hayrın nukūd-ı mevkūfesine hâlâ mütevellî olan bâ‘isü’l-kitâb el-Hâc Kadri b. el-Hâc Hasan mahfil-i kazâda mahmiye-i mezbûrede Sancakdâr Hayreddin mahallesi ahâlîsinden iken bundan akdem vefât eden merhûm Hattat Osman Efendi b. Ali’nin evlâd-ı sıgārının tesviye-i emrlerine vasiyy-i şer‘îleri olmağla terekesine vaz‘-ı yed eden Ahmed Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûr Osman Efendi b. Ali b. Sinan bin yüz on Muharremi gurresinden mukaddem vakf-ı mezbûra mütevellî olan işbu hâzır bi’l-meclis İmâm Ali Efendi yedinden asl-ı mal-ı vakf-ı mezbûrdan elli guruş istidâne ve kabz edip târîh-i mezbûr ile müverrah deyn-i mezbûru nâtık hatt ü hatmini hâvî işbu temessüğü dahi yedine def‘ edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede İnebey mahallesinde sâkin Musa Efendi b. Hasan ve Hasan Efendi b. Musa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Hattat Osman Efendi b. Ali b. Sinan bin yüz on Muharremi gurresinde vakf-ı mezbûra mütevellî olan işbu İmâm Ali Efendi yedinden asl-ı mal-ı vakf-ı mezbûrdan elli guruş istidâne ve kabz edip deyn-i mezbûru nâtık hatt ü hatmini hâvî işbu temessüğü dahi huzûrumuzda yedine def‘ eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın meblağ-ı mezbûru müteveffâ-yı mezbûrdan hayâtında ahz ü istîfâ etmeyip mukābelesinde rehni dahi olmadığına mütevellî-i sâbık mezbûr İmâm Ali Efendi’ye yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm mâ-vaka‘a kayd-şüd. Fî 7 min-Recebi’l-ferd sene 1110 Şuhûdü’l-hâl: Yahya Efendi b. Mustafa Efendi, Molla Mehmed b. İbrahim, Mehmed Çelebi b. Kadri, Hasan Çelebi b. Mehmed, Siyavuş b. Abdullah.