Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 919 Hüküm no: 756 Orijinal metin no: [171a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefat eden eşi Mahmud Efendi’de alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i şerîfden me’zûnen Mevlânâ Mehmed Rûşenî Efendi irsâl olunup ol dahi mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Safiye Hatun bt. Ahmed Efendi ile sagīre kızı Zeyneb’e münhasıra oldukdan sonra zâtı ta‘rîf-i şer‘î ile mu‘arrefe olan işbu hâfızü’l-kitâb zevcesi merkūme Safiye Hatun meclis-i ma‘kūd-ı mezbûrda sagīre-i mezbûrenin tesviye-i umûruna li-ecli’d-da‘vâ vasî nasb olunan İbrahim Efendi b. Yusuf mahzarında üzerine da‘vâ ve takrîr-i kelâm edip zevcim müteveffâ-yı mezbûr Mahmud Efendi b. Hasan b. Ali irs-i şer‘le babam müteveffâ-yı mezbûrdan bana isâbet eden üç yüz elli beş guruşumu bi-tarîkı’l-emâne ahz u kabz ve kendi mesârifine sarfla istihlâk edip hattâ târîh-i kitâbdan üç buçuk sene mukaddem müteveffâ-yı mezbûr hacc-ı şerîfe gider oldukda zevcem işbu Safiye Hatun’un mal-ı mevrûsu olan üç yüz elli beş guruşu bi-tarîkı’l-emâne ahz u kabz eylediğimden sonra kendi mesârifime sarfla istihlâk etmekle meblağ-ı mezbûr zevcem mezbûreye zimmetimde vâcibü’l-edâ deynimdir deyü alâ-ruûsi’l-işhâd ikrâr ve işhâd eyledikden sonra müteveffâ-yı mezbûrun ( ) ismiyle müsemmâ bir re’s câriyesini yüz kırk guruşa müteveffâ-yı mezbûrdan ben iştirâ ve kabz ve semeni olan meblağ-ı mezbûr yüz kırk guruşu zimmetinde olan üç yüz elli beş guruşun yüz kırk guruşuna takas ol dahi mukāssa ve kabûl edip meblağ-ı bâkī iki yüz on guruş zimmetinde bana vâcibü’l-edâ deyni iken [171b] kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Akbıyık mahallesi sükkânından Mehmed Efendi b. Süleyman ve Abdurrahman Ağa b. Muslu li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Mahmud Efendi b. Hasan b. Ali târîh-i mezkûrda hacc-ı şerîfe gider oldukda zevcem işbu Safiye Hatun <> bt. Ahmed Efendi’nin mal-ı mevrûsu olan meblağ-ı mezkûr üç yüz elli beş guruşu bi-tarîkı’l-emâne ahz u kabz ve kendi mesârifime sarfla istihlâk etmekle meblağ-ı mezbûr üç yüz elli beş guruş zevcem mezbûreye zimmetimde vâcibü’l-edâ deynim vardır deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın müdde‘iye-i mezbûre zevci müteveffâ-yı mezbûr zimmetinde olan üç yüz elli beş guruşun yüz kırk guruşunu müteveffâ-yı mezbûrdan iştirâ eylediği câriye semenine takas eyledim deyü i‘tirâf eylediği yüz kırk guruşdan mâ‘adâ meblağ-ı bâkī-i mezkûr iki yüz on beş guruşu dahi zevci müteveffâ-yı mezbûrdan ahz u kabz veyâ âhara havâle veyâ hîbe veyâ turuk-ı şer‘iyyeden bir tarîk ile zimmetini ibrâ eylediğine müdde‘iye-i mezbûreye yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebiyle meblağ-ı bâkī-i mezbûr iki yüz on beş guruşu müteveffâ-yı mezbûrun terekesinden edâya ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Molla İsmail b. Zülfikâr ve Mehmed b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî gurreti Recebi’l-ferd sene 1110 Şuhûdü’l-hâl: Fahrü’l-müderrisîni’l-kirâm Ahmed Efendi b. İbrahim, fahrü’l-eimme Ahmed Efendi b. Hamza, İmâm İbrahim Efendi b. Halil, Hüseyin Bey b. Halil, el-Hâc Ali Efendi b. Mehmed Efendi, Mustafa Efendi b. Musa, Molla Osman b. Ali.