Bab Mahkemesi 54 Numaralı Sicil (H. 1102 / M. 1691) cilt: 20, sayfa: 71 Hüküm no: 29 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Asayi’ye Ermeni cemâatinin işlerine karışmaması için tenbih Dârü’l-hilâfeti’l-aliyye Kostantıniyye el-mahmiye’de vâki‘ altı cemâ‘at Ermenilerinin Meryem Ana cemâ‘atinden Nihabed v. Kirkor ve Ovanes v. Aydın? ve Haçador ve. Karabet ve Agob v. Avadik ve Aritun v. Kiragos ve Bedros v. Toros ve Simon v. Agob ve David v. Murad ve Bağdasar v. Perzad ve Ovanes v. Kiragos ve Ferid? v. Asayi ve Abraham v. Kilazir? ve Sulu Manastır cemâ‘atinden Ovanes v. Sakar ve Avakim v. Mardiros ve Asvador v. Yazıcan ve Ağya v. Asvador ve Devriş? v. Karabet ve Balat cemâ‘atinden Bağdasar v. Bogos ve Arzuman v. Şehri ve David v. Cansız ve Aritun v. Bogos v. Kirkor ve İsrail ve Elmas v. Anderiyas ve Agob v. Serkis ve Mıgırdiç v. Menkasar ve sâir cemâ‘atinden ma‘lûmü’l-esâmi ve mahsûrü’l-eşhâs cemm-i gafîr ve cem‘-i kesîr meclis-i şer‘-i şerîf-i enver ve mahfil-i dîn-i münîf-i ezherde, yine tâife-i mezbûreden Kirkor v. Asayi nâm Ermeni muvâcehesinde her biri üzerine da‘vâ ve takrîr-i kelâm edip, merkūm Kirkor tâife-i mezbûreden hâzırân bi’l-meclis Makrâscı Melkon ve Kesusder v. Kirkor gāibûn ani’l-meclis Asvador v. Murad ve Mıgırdiç v. Kebabcı ve Semaven v. Arakil ile yekdil ve müttefik olup, umûrumuza müdâhale edip, şu hâllerinden nâşî beynimizde küllî ihtilâl ve bâ‘isü kīl ü kāl olup, nizâm-ı hâlimiz müşevveş ve muhtel olmağın, husûs-ı mezbûr mersûm Kirkor’dan suâl olunup, min ba‘d umûrumuza karışmamak üzre tenbîh olunması matlûbumdur dediklerinde, merkūm Kirkor dahi fi’l-hakīka tâife-i mezkûre kendilerden dilgîr olmağla, kendi dahi kat‘â ahvâllerine müdâhale ve işlerine karışmamağı iltizâm etmeğin, mûcebiyle merkūm Aritun ber vech-i meşrûh nizâm-ı hâllerini muhıll-ı vaz‘ u hareket etmeyip, rusûm-ı mîrî ve sâir kiliseleri ahvâline karışmamak üzre tenbîh olunup, işbu vesîka ketb olundu. Fi’l-yevmi’r-râbi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, Mustafa Çelebi b. Ahmed, İbrahim Çelebi b. Ahmed, İbrahim Çelebi b. Mehmed.