Bab Mahkemesi 54 Numaralı Sicil (H. 1102 / M. 1691) cilt: 20, sayfa: 72 Hüküm no: 30 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Yusuf’un boşandığı eşi ile herhangi bir davasının kalmadığı Husûs-ı âti’z-zikrin mahallinde ketb ve tahrîri için savb-ı şer‘den Mevlânâ Ali Efendi b. Mustafa irsâl olunup, ol dahi mahmiye-i İstanbul’da Mimar Kemal mahallesi sâkinlerinden olup zât-ı mezbûreyi ma‘rifet-i şer‘iyye ile ârifân Hüseyin Bey b. Ahmed ve Ali Bey b. Mehmed ta‘rîfleriyle mu‘arrefe olan Ayşe bt. Yusuf nâm hâtunun menziline varıp, zeyl-i vesîkada mastûrü’l-esâmi müslimîn huzûrlarında akd-i meclis-i şer‘-i şerîf eyledikde, mezbûre Ayşe Hâtun meclis-i ma‘kūd-ı merkūmda zevc-i mutallıkı Süleyman Ağa b. Ömer ve Ali b. Abdurrahman tarafından husûs-ı âti’l-beyâna vekîl olup vekâleti el-Hâc Osman Ağa b. Ahmed ve Ahmed Bey b. Abdullah şehâdetleri ile şer‘an sâbit olan Mehmed Ağa b. Mehmed mahzarında tav‘an ikrâr ve takrîr-i kelâm edip, müvekkil-i mezbûr Süleyman Ağa ile beynimizde hüsn-i zindegânemiz olayıp vekîl-i mezbûr bi’l-vekâle bâyinen beni tatlîk ettiğinden [5b] müvekkil-i mezbûrun zimmetinde mütekarrir ve ma‘kūdun aleyh olan otuz bin akçe mehr-i müeccelimin yirmi iki bin akçesini ve nafaka-i iddet ve me’ûnet-i süknâm için bi’t-terâzî ta‘yîn olunan iki bin akçe ki, cem‘an yirmi dört bin akçeyi vekîl-i mezbûr Mehmed Ağa bana def‘ ve teslîm, ben dahi yedinden ahz u kabz ettiğimden sonra mehrimden bâkī kalan sekiz bin akçeye ve hukūk-ı zevciyyete ve sâir beynimizde cereyân eden ahz u i‘tâya müte‘allika âmme-i da‘vâdan ben müvekkil-i mezbûrun zimmetini ibrâ-i âm ile ibrâ ve iskāt edip, vekîl-i mezbûr Mehmed Ağa dahi benim zimmetimi kezâlik min cemî‘i’d-de‘âvî ibrâ ve iskāt eyledik dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr, ba‘dehû ma‘an ba‘s olunan Çukadâr el-Hâc Hasan b. Abdullah ile meclis-i şer‘a gelip alâ vukū‘ihî inhâ ve takdîr etmeğin, mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Abdullah Efendi b. Mehmed el-imâm, Ali Efendi b. ( ), Ebûbekir Çelebi b. Süleyman, İsmail Ağa b. Ali, Ahmed b. Şaban, İsmail vekîl-i imâm.