Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 921 Hüküm no: 757 Orijinal metin no: [171b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in vefat eden Çörekçi Ali Çelebi’nin vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Müfti Ali Çelebi mahallesinde sâkin iken bundan akdem vefât eden Çörekçi es-Seyyid Ali Çelebi b. Abdülhalim’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkeleri Kerime bt. Mehmed ve Müslime bt. Mustafa ile li-ebeveyn karındaşı oğulları es-Seyyid Mehmed’e ve Bor kasabasında sâkin Zeynelabidin ve Mustafa ibnâ es-Seyyid Cemal’e münhasıra oldukdan sonra mezbûr es-Seyyid Mehmed meclis-i ma‘kūd-ı mezbûrda zâtları ta‘rîf-i şer‘î ile mu‘arrefe olan mezbûretân Kerime ve Müslime nâm hatunlar mahzarlarında üzerlerine da‘vâ ve takrîr-i kelâm edip ammim müteveffâ-yı mezbûr es-Seyyid Ali Çelebi b. Abdülhalim hasta ve alîl iken bi-emrillâh fevtimden sonra cemî‘ terekemden vech-i mesnûn üzere levâzım-ı techîz ve tekfînim görüle ve düyûnum kazâ oluna ve bâkī kalan terekemden zevcelerim hisse-i irsiyelerini kabz ettiklerinden sonra Bor kasabasında sâkinler olan karındaşım oğulları Zeynebabidin ve Mustafa’nın hisseleri kabz ve îsâl oluna deyü huzûr-ı Müslimînde vasiyet ve tenfîzine beni vasiyy-i muhtâr nasb ü ta‘yîn edip ben dahi muvâcehesinde kabûl ve musırran-aleyhâ vefât eyledikde tenfîz-i vesâyâ murâd eylediğimde mezbûretân mâni‘a olurlar suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûrede Gül Câmi‘i mahallesinde sâkin el-Hâc İvaz b. Abdullah ve el-Hâc Hüseyin b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Çörekçi es-Seyyid Ali b. Abdülhalim hasta ve alîl iken bi-emrillâhi te‘âlâ fevtimden sonra cemî‘ malımdan vech-i mesnûn üzere levâzım-ı techîz ve tekfînim görüle ve düyûnum kazâ oluna ve bâkī terekemden zevcelerim hisselerini kabz ettikden sonra Bor kasabasında sâkin karındaşım oğulları Zeynelabidin ve Mustafa’ya isâbet eden hisseleri îsâl oluna deyü huzûrumuzda vasiyet ve tenfîzine karındaşı oğlu işbu mezbûr es-Seyyid Mehmed Çelebi’yi vasiyy-i muhtâr nasb ü ta‘yîn eyledikde ol dahi muvâcehesinde kabûl ve musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 5 min-Receb sene 1110 Şuhûdü’l-hâl: Süleyman Beşe b. Bayram, Mustafa Yazıcı b. Mehmed, Hüseyin Beşe b. Süleyman, Halil b. İsmail, İbrahim Dede.