Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 922 Hüküm no: 758 Orijinal metin no: [171b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Efendi’nin kızı Zeyneb’e iki yüz altın hibe ettiğinin tescil edildiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan b. Ali’nin verâseti zevce-i menkûha-i metrûkesi Safiye Hatun bt. Ahmed Efendi ile sulbiye sagīre kızı Zeyneb’e münhasıra oldukdan sonra sagīre-i mezbûreye li-ecli’d-da‘vâ vasî nasb olunan râfi‘ü’l-kitâb İbrahim Efendi b. Yusuf meclis-i şer‘de müteveffâ-yı mezbûrun zevcesi olup zâtı ta‘rîf-i şer‘î ile mu‘arrefe olmağla terekesine vâzı‘atü’l-yed olan mezbûre Safiye Hatun mahzarında üzerine da‘vâ ve takrîr-i kelâm edip müteveffâ-yı mezbûr Mahmud Efendi b. Hasan b. Ali fevtinden üç sene mukaddem terekesinden işbu aynı mevcûd beş yüz guruş olmak üzere iki yüz yaldız altınını kızı sagīre-i mezbûre Zeyneb’e hîbe-i sahîha-i şer‘iyye ile hîbe ve temlîk ve velâyeten kabz eylediğini alâ-ruûsi’l-işhâd ve ikrâr edip vefât ettikde zevcesi mezbûre Safiye Hatun tereke-i müteveffâ-yı [172a] mezbûrdan olmak üzere vaz‘-ı yed ve bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden olup mahrûse-i Galata müzâfâtından kasaba-i Beşiktaş’da Maçka mahallesi ahâlîsinden umdetü’l-müderrisîni’l-kirâm Ömer Efendi b. Hüseyin ve mahmiye-i mezbûrede Balaban Ağa mahallesinden fahrü’l-müderrisîni’l-kirâm Ahmed Efendi b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Mahmud Efendi b. Hasan b. Ali fevtinden üç sene mukaddem terekesinde aynı mevcûd beş yüz guruş olmak üzere iki yüz yaldız altınını kızı sagīre-i mezbûre Zeyneb’e hîbe-i sahîha-i şer‘iyye ile hîbe ve temlîk ve velâyeten kabz eylediğini huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî gurreti Receb sene 1110 Şuhûdü’l-hâl: Umdetü’l-mevâli’l-izâm izzetlü İvaz Efendi b. Mehmed Efendi, zübdetü’l-mevâli’l-izâm fazîletlü Mustafa Efendi b. ( ), Ahmed Efendi b. Hamza el-İmâm, İbrahim Efendi b. Ahmed el-İmâm, el-Hâc Mehmed Ağa b. Mustafa, Abdullah Efendi b. Mehmed, el-Hâc Ali Efendi b. Mehmed, Abdullah Çelebi b. İbrahim Efendi, Ahmed Bey b. Mehmed.